Çoxlu sayda olan tətbiqdən gələn push bildirişlər təkcə mobil deyil həm də desktop əməliyyat sistemlərinin əsas problemlərindən biridir. Kompüter istifadəçilərinin bu məsələ ilə bağlı vəziyyətlərini yüngülləşdirmək istiqamətində Microsoft şirkəti Windows 11 üçün yenilənmə hazırlayıb. Belə ki, Windows 11-in beta versiyasında Smart opt-out adlı funksiya ortaya çıxıb. Sözügedən funksiya əməliyyat sisteminin Taskbar hissəsində ortaya çıxan bildirişlərin saylarını azaltmaq üçün nəzərdə tutulub. Bu funksiya istifadəçinin əməliyyat sisteminə quraşdırılmış tətbiqlər ilə qarşılıqlı əlaqə tezliklərini analiz edərək nadir hallarda istifadə edilən tətbiqlərdən gələ biləcək bildirişlərin deaktiv edilməsini təklif edir. Hal hazırda Smart opt-out funksiyası Windows 11-in test versiyasında aktivdir. Onun əməliyyat sisteminin stabil versiyasında yaxın aylar ərzində istifadəyə verilməsi gözlənilir.