Apple açıq iCloud linklərində zərərli məzmun axtaracaq

    “Apple” “iCloud”da açıq linklə paylaşılan foto və fayllarda zərərli məzmunu yoxlamağa başlayacaq. Dəyişiklik “iOS 27.3”, “iPadOS 27.3”, “macOS 27.3” və “visionOS 27.3” versiyalarında işə düşəcək. Yoxlama yalnız “Linki olan hər kəs” seçimi ilə paylaşılan materiallara aid olacaq. Yalnız dəvət edilən şəxslərin görə bildiyi paylaşımlar yoxlanılmayacaq.

    İstifadəçilər “iCloud Photos”dakı fotonu və ya “iCloud Drive”dakı faylı link kimi paylaşa, yaxud surətini göndərə bilirlər. Linklə paylaşım zamanı 2 seçim var: “Seçdiyiniz şəxslər” və “Linki olan hər kəs”. İkinci variant seçildikdə materialı linkə çatan hər kəs, həmçinin “Apple” görə bilir. Şirkət 27.3 versiyalarından başlayaraq belə açıq materialları yoxlayacaq.

    Açıq linklə paylaşılan məzmun “Advanced Data Protection” aktiv olsa belə, başdan sona şifrələnmir. Yəni “Apple” həmin materiallara baxa və onları yoxlaya bilir. Şirkət hansı materialların zərərli sayılacağını və yoxlamanın necə aparılacağını hələ açıqlamayıb. Dəyişiklik “iCloud”da uşaqların cinsi istismarı ilə bağlı materiallara qarşı tədbirlərin gücləndirilməsi çağırışlarından sonra hazırlanıb.

    “Apple” zərərli saydığı materialı köçürə, dəyişdirə, qəbul etməyə və ya silə bilər. Şirkət istifadəçinin “Apple Account” hesabını bloklaya və ya tam bağlaya bilər. Əlaqəli telefon nömrəsi və elektron poçt ünvanı ilə yeni hesab yaratmağı da əngəlləyə bilər. Lazım gəldikdə hüquq mühafizə orqanlarına da müraciət edə bilər.

    “iOS 27.3”ün tərtibatçılar üçün ilk beta versiyası artıq çıxıb. Yeniləmədə “Siri” üçün süni intellektlə bağlı təkmilləşdirmələr, “Safari” yenilikləri və yeni “Apple Health” tətbiqi də var. “iOS 27.3” üçün sabit versiya 2026-cı ilin dekabrında gözlənilir. Digər 27.3 yeniləmələrinin də həmin dövrdə çıxarılması planlaşdırılır.