Görünür, Lapsus$ adlı hacker qruplaşması Samsung-dan sonra növbəti hədəfi kimi Microsoft şirkətini seçib. Bu barədə məlumatı sözügedən hacker qruplaşması öz Telegram kanalında foto vasitəsilə yerləşdirib. Verilmiş məlumata əsasən hackerlər çox güman ki, Microsoft Azure DevOps repozitoriyalarını əldə ediblər. Sübut qismində isə hackerlər Cortana səsli köməkçisinin mənbə kodunu və Bing axtarış sistemi üzərində qurulmuş bir neçə layihəni özündə birləşdirən məlumatlar bazasının fotosunu təqdim ediblər. Microsoft məlumat sızıntısının baş verdiyini hələ təsdiqləməyib. Lakin məlumata əsasən şirkət artıq daxili istintaqına start verib.

    Qeyd etmək lazımdır ki, bir neçə müddət bundan öncə Lapsus$ adlı hacker qruplaşması həmçinin NVIDIA və Samsung şirkətlərinə qarşı kiberhücumlar reallaşdırmışdı. Bununla belə həmin şirkətlər hackerlər tərəfindən hansısa tələblərin olduğunu bildirməmişdilər. Microsoft-un bəzi məhsulları barəsində məlumatlar bazasının sızdırılması məsələsinə gəldikdə isə hackerlərin bunu hansı üsul vasitəsilə reallaşdırdıqları barəsində də məlumat verilməyib. Lakin çox güman ki, hackerlər şirkət əməkdaşlarından birinin istifadəçi hesabına kiberhücum reallaşdıraraq bunu həyata keçiriblər. Microsoft daha öncədən də qeyd edib ki, onun məhsullarının mənbə kodlarının sızdırılması şirkət müştəriləri üçün böyük risklər yaratmır.