Nvidia rəhbəri xəyanətini etiraf etdi, şirkət casusluq iddiasını araşdırır

    “Nvidia” şirkətinin direktorlar şurası baş direktor Jensen Huang barədə müstəqil araşdırmaya başlayıb. Araşdırma Huangın xarici kəşfiyyat əməliyyatının hədəfinə çevrilməsi və “Megaspeed” rəhbəri Alice Huangla münasibəti barədə iddiaları əhatə edir. Jensen Huang əməkdaşlara göndərdiyi məktubda bu qadınla romantik münasibətdə olduğunu və həyat yoldaşına xəyanət etdiyini təsdiqləyib. Alice Huangın Çin kəşfiyyatı ilə işləməsi barədə iddia isə hələ müstəqil şəkildə sübuta yetirilməyib.

    Şuranın açıqlamasına görə, araşdırmanı müstəqil direktorlar komitəsi aparacaq və kənar hüquq məsləhətçiləri də prosesə qoşulacaq. Şura hazırda məxfi məlumatlara və ya ABŞ-nin milli təhlükəsizliyinə zərər dəydiyini göstərən əsas olmadığını deyib. Bununla belə, əldə olan bütün məlumatlar yoxlanılacaq. Huang araşdırma ilə tam əməkdaşlıq edəcəyini açıqlayıb. Direktorlar şurası da rəhbərə və onun komandasına etimadının davam etdiyini vurğulayıb.

    Huang Le adı ilə də tanınan Alice Huang Sinqapurda yerləşən məlumat mərkəzi operatoru “Megaspeed” şirkətində yüksək vəzifədə çalışıb. ABŞ rəsmiləri onun Jensen Huanga yaxınlaşması üçün Çin Dövlət Təhlükəsizliyi Nazirliyi tərəfindən cəlb edildiyini düşünür. İddiaya əsasən, Alice Huang məlumatları Pekinə ötürüb və Çin şirkətlərinə ixracı məhdudlaşdırılmış süni intellekt çiplərini almaqda kömək edib. ABŞ rəsmiləri onun “Nvidia” ilə Asiyada məlumat mərkəzləri qurduğu vaxt Çin hökuməti ilə məlumat paylaşdığı qənaətinə də gəliblər.

    “Megaspeed” “Nvidia” şirkətinin müştərisidir. ABŞ Ticarət Nazirliyi 2024-cü ilin sonunda şirkətin Çin üçün tətbiq olunan çip ixracı məhdudiyyətlərini aşmağa kömək edib-etmədiyini araşdırmağa başlayıb. İş daha sonra Ədliyyə Nazirliyinə keçib. “Megaspeed” yoxlamalar zamanı qanunsuz çip ötürülməsinə dair sübut tapılmadığını deyir. Donald Trump bəzi məhdudiyyətləri yumşaltsa da, ABŞ ən güclü AI çiplərinin Çin şirkətlərinə satışını hələ də qadağan edir. Digər çiplərin satışı üçün ayrıca icazə alınmalıdır.

    Huang məktubunda ailəsindən və əməkdaşlarından üzr istəyib. O, davranışının həyat yoldaşına və uşaqlarına zərər verdiyini, məsuliyyəti üzərinə götürdüyünü yazıb. Huang ailəsinin etimadını yenidən qazanmağa çalışacağını da deyib. Jensen Huang və Alice Huang 2024 və 2025 illərində Taypeydə birlikdə görüntüləniblər. “Nvidia” həmin görüşlərə Asiyadakı başqa bulud xidməti tərəfdaşlarının da qatıldığını və həssas məlumatların paylaşılmadığını açıqlayıb.

    Alice Huangın Çin banklarında, hedc fondlarında və süni intellekt şirkətlərində işlədiyi deyilir. Onun Jensen Huangla yaxınlığından biznesini tanıtmaq üçün yararlandığı da iddia olunur. Sinqapur və Tayvanda barəsində araşdırma aparıldığı yazılsa da, Sinqapur Daxili İşlər Nazirliyi bunu təkzib edib. Alice Huang 2024-cü ilin sonlarında bir müddət Çində yoxa çıxıb. Hazırda onun harada olduğu və “Megaspeed” şirkətində işləyib-işləmədiyi bilinmir. Çin səfirliyi casusluq iddialarını rədd edib.

    Hadisə siyasi araşdırmaların da mövzusuna çevrilib. Donald Trumpa məsələ barədə məlumat verildiyi deyilir. Jensen Huangın prezidentlə yaxın münasibətinə görə administrasiyanın süni intellekt siyasəti ilə bağlı müzakirələrindən öyrəndiklərini Alice Huanga çatdıra biləcəyi narahatlıq yaradıb. Senator Chris Coons Konqresin məsələni araşdıracağını deyib. Nümayəndələr Palatasındakı respublikaçı komitə sədrləri Huangdan münasibət və həssas məlumatların necə qorunduğu barədə məlumat istəyərək 11 noyabrı son tarix kimi müəyyənləşdiriblər.