OpenAI Linux-da 948 təhlükəsizlik boşluğu tapan AI sistemi təqdim etdi

    “OpenAI” “Linux” nüvəsində təhlükəsizlik boşluqlarını özü tapan, yoxlayan və onlar üçün yama, yəni düzəliş hazırlayan süni intellekt (AI) sistemi barədə məlumat yayıb. Şirkətin hesablamasına görə, sistem hər işə salınanda işlənən tokenlərin API dəyəri 1 213 430 dollar (təxminən 2 062 830 manat) olardı. Tokenlər AI modelinin mətn və kodu emal edərkən işlədiyi kiçik hissələrdir. “Linux” nüvəsi “Android” telefonlarının və internet infrastrukturunun böyük hissəsinin əsasını təşkil edir.

    İlkin yoxlama zamanı sistem 2 308 potensial təhlükəsizlik boşluğu aşkarlayıb. Daha sonra ciddi görünən boşluqlar seçilərək virtual kompüter mühitində sınaqdan keçirilib. Məqsəd həmin boşluqlardan yararlanaraq sistemi tam nəzarətə götürməyin olub-olmadığını yoxlamaq idi. Nəticədə 948 boşluğun real təhlükə yaratdığı təsdiqlənib.

    Bu prosesdə çoxsaylı AI proqramları eyni vaxtda kodu araşdırıb, boşluqları yoxlayıb və düzəlişlər hazırlayıb. Təhlükəli olduğu təsdiqlənən 948 boşluğun hər biri üçün ayrıca yama kodu yazılıb. Ancaq bu dəyişikliklər birbaşa “Linux” koduna əlavə edilməyib. Yamalar tətbiqdən əvvəl insan mütəxəssislərin yoxlamasına və təsdiqinə göndərilib.

    Şirkətin hesablamasına görə, təsdiqlənmiş hər hücum nümunəsi üzrə token xərci 1 279 dollar (təxminən 2 170 manat) olub. Müqayisə üçün, təhlükəsizlik boşluqlarını tapıb şirkətlərə xəbər verən ağ papaqlı hakerlər adətən 20 000 dollardan (təxminən 34 000 manat) 70 000 dollaradək (təxminən 119 000 manat) mükafat alırlar. Bu məbləğlər 948 boşluq üçün hesablananda nəzəri dəyər 18,9 milyon dollardan (təxminən 32,1 milyon manat) 66,3 milyon dollaradək (təxminən 112,7 milyon manat) çatır. Bu da sistemin hesablanan xərcindən 16 - 55 dəfə çoxdur.

    “OpenAI” belə yanaşmanı ilk dəfə sınamır. Şirkət iyunda “Patch the Planet” təşəbbüsü çərçivəsində oxşar sistemi daha kiçik miqyasda işlətmişdi. “Google” da ötən il “Big Sleep” adlı avtomatik boşluq axtarış alətinin davam edən hücumu dayandırdığını açıqlamışdı. Bu layihələr AI şirkətlərinin proqramlardakı təhlükəsizlik boşluqlarını avtomatik tapmağa daha çox diqqət ayırdığını göstərir.