Acer IFA 2025-də: planşetlər, monitorlar və Wi-Fi 7 router ilə rəqəmsal həyatın yeni mərhələsi

    Berlin hər il texnologiya dünyasının ən böyük sərgilərindən biri olan IFA-ya ev sahibliyi edir. Bu dəfə də tədbir nəhəng brendlərin yeni məhsullarının təqdimatları ilə yadda qaldı. Acer isə sərgidə geniş istehlakçı portfelini nümayiş etdirərək fərdi istifadəçilərdən tutmuş müasir iş mühitinə qədər hər kəs üçün nəzərdə tutulan cihazlarını təqdim etdi. Şirkət bir-birindən maraqlı planşetlər, minimalist dizaynlı monitorlar, yüksək performanslı OLED ekran və Wi-Fi 7 dəstəyi ilə sabit şəbəkə təmin edən router ilə çıxış etdi. Məqsəd aydındır: insanların işləmə, öyrənmə və əlaqə saxlama təcrübəsini daha da yüksəltmək.

    Acer-in diqqət çəkən yeniliklərindən biri Iconia X seriyası planşetlər oldu. Bu modellər məhsuldarlıq və əyləncəni birləşdirmək üçün hazırlanıb. Iconia X12 12.6 düymlük AMOLED ekranı, MediaTek Helio G99 prosessoru və 16 saata qədər enerji təmin edən batareyası ilə həm iş, həm də multimedia üçün əlverişli seçimdir. Yalnız 500 qramlıq çəkisi onu mobil istifadəçilər üçün ideal hala gətirir. Cihaz əlavə olaraq stilus qələm, klaviatura və maqnitli dayaqlıq dəstəyi ilə təklif olunur. Daha iri Iconia X14 modeli isə süni intellekt funksiyaları ilə fərqlənir: jestlə idarəetmə, duruşun izlənməsi və gülümsəmə zamanı avtomatik şəkil çəkilişi artıq planşetlə ünsiyyəti daha interaktiv edir. 

    Bununla yanaşı, Acer Iconia A seriyasını da genişləndirdi. A16 və A14 modelləri Android 15 üzərində işləyir, AI dəstəyi ilə daha ağıllı qarşılıqlı əlaqə imkanı verir. Tripod tipli inteqrasiya edilmiş dayaqlar əlavə aksessuara ehtiyacı aradan qaldırır, geniş IPS ekranları isə həm iş, həm də kontent izləmək üçün rahatdır. 10 saata qədər enerji təmin edən batareyaları ilə bu planşetlər gün boyu aktiv istifadəyə uyğunlaşır. Maraqlı məqamlardan biri də bütün Iconia planşetlərində təqdim olunan Acer Screen Casting funksiyasıdır. Bu imkan planşeti simsiz şəkildə noutbuk üçün ikinci ekran kimi istifadəyə yararlı edir və iş mühitini daha çevik hala gətirir.

Monitor bazarında da Acer boş durmadı. Şirkətin yan brendi olan Amadana minimalizm və funksionallığı birləşdirən yeni modellərini təqdim etdi. Amadana 16APM1QJ sadəcə 0.65 kq çəkisi ilə daşına bilən 15.6 düymlük monitor kimi həm tələbələr, həm də tez-tez səyahət edənlər üçün ideal seçimdir. Daha böyük Amadana 27ART0 P1 isə 27 düymlük IPS paneli, 144 Hz yeniləmə tezliyi və sadə dizaynı ilə istər evdə, istər ofisdə müasir iş masasının mərkəzinə çevrilə bilər.

Yüksək performans axtaranlar üçün isə Acer CE270U Z OLED monitorunu təqdim etdi. Bu ekran 280 Hz yeniləmə tezliyi, 0.03 ms cavab müddəti və 1000 nit HDR parlaqlığı ilə oyunçular və kontent yaradıcıları üçün əsl performans nəhəngidir. Rəng dəqiqliyini təmin edən 99% DCI-P3 dəstəyi, AMD FreeSync Premium Pro texnologiyası və güclü daxili dinamikləri ilə CE270U Z həm iş, həm də əyləncə üçün nəzərdə tutulub.

    Təqdimatın başqa bir maraqlı hissəsi isə şəbəkə seqmenti oldu. Acer Connect T36 Wi-Fi 7 Dual-Band Mesh Router modelini təqdim etməklə müasir ev və ofislərin ən böyük ehtiyaclarından birinə – sabit və sürətli internet bağlantısına cavab verdi. 3.6 Gbps-ə qədər sürət dəstəyi, 4K axın, aşağı gecikməli oyun və ağıllı ev sistemləri üçün sabit şəbəkə yaratmaq bu cihazın əsas üstünlüklərindəndir. Mesh texnologiyası sayəsində T36 router evin və ya ofisin hər nöqtəsində fasiləsiz əlaqə təmin edir. İstifadəçi otaqdan otağa keçərkən avtomatik node-switching funksiyası bağlantının kəsilməsinə imkan vermir. Kompakt dizayn və mobil tətbiq vasitəsilə sadə quraşdırma isə onu gündəlik həyat üçün praktik seçimə çevirir.

    IFA 2025-də Acer-in sərgilədiyi bu məhsullar şirkətin strategiyasını bir daha ortaya qoydu. Iconia planşetləri, Amadana monitorları, OLED displeylər və Wi-Fi 7 router – bütün bunlar Acer-in rəqəmsal həyatın müxtəlif tərəflərinə toxunduğunu göstərir. Məqsəd yalnız yeni cihaz təqdim etmək deyil, həm də istifadəçilərin iş, öyrənmə və əyləncə vərdişlərini bir ekosistem daxilində daha məhsuldar və rahat hala gətirməkdir.