Apple Avropada məhkəməni uduzdu

    Apple Avropa Birliyində App Store ilə bağlı açdığı mühüm məhkəmə işini uduzub. Avropa Ədalət Məhkəməsinin qərarına əsasən, şirkət Rəqəmsal Bazarlar Aktı çərçivəsində "gatekeeper" statusunu qoruyacaq və rəqib xidmətlərin ekosistemə inteqrasiyasına imkan verməyə davam edəcək. Qərar Apple-ın iOS, iPadOS, macOS, watchOS və tvOS platformalarındakı bütün tətbiq mağazalarına şamil edilir. Məhkəmə bu mağazaların vahid əsas platforma xidməti kimi qiymətləndirilməsi ilə bağlı Avropa Komissiyasının qərarını qüvvədə saxlayıb.

    Apple məhkəmədə üç əsas məsələyə etiraz etmişdi. Şirkət ilk olaraq üçüncü tərəf cihazlarının iPhone ilə daha geniş inteqrasiyasının təhlükəsizlik riskləri yaradacağını bildirirdi. Bundan əlavə, DMA çərçivəsində "gatekeeper" statusunun verilməsinin düzgün olmadığını müdafiə edirdi. Apple həmçinin iMessage xidməti ilə bağlı aparılan araşdırmaya qarşı da iddia qaldırmışdı. Məhkəmə iMessage ilə bağlı Apple-ın iddiasını da qəbul etməyib. Bununla belə, əvvəlki qərar dəyişmədiyi üçün iMessage hazırda digər mesajlaşma platformaları ilə məcburi uyğunlaşdırılmayacaq.

    Əsas qərara əsasən isə Apple rəqib tətbiq mağazaları və xidmətlərinə qarşı ayrı-seçkilik edə bilməz, öz xidmətlərinə üstünlük verməməli və alternativ platformaların sistemlə inteqrasiyasına imkan yaratmalıdır. Şirkət qərarla razılaşmadığını açıqlayıb. Hazırda şirkətin qərardan apellyasiya şikayəti verib-verməyəcəyi məlum deyil.