ASUS 748 GB yaddaşlı süni intellekt iş kompüteri təqdim etdi

    “ASUS” məlumat mərkəzlərində süni intellekt hesablamaları üçün hazırladığı “ExpertCenter Pro ET900N G3” iş stansiyasını təqdim edib. Cihazın əsasını “Nvidia GB300 Grace Blackwell Ultra Superchip” təşkil edir. Rəsmi qiymət açıqlanmayıb, amma sistemin 100 000-120 000 dollara (təxminən 170 000-204 000 manat) başa gələcəyi gözlənilir. Hündürlüyü 584 mm, eni 232 mm-dir. Dərinliyi 565 mm, çəkisi 27 kq-dır.

    “ExpertCenter Pro ET900N G3” daxilində 72 Arm nüvəsi və “Blackwell Ultra” qrafik çipi var. Sistem həmçinin 748 GB vahid yaddaşla təchiz edilib. Vahid yaddaş prosessor və qrafik çip üçün ortaq yaddaş sahəsidir. Beləliklə, böyük süni intellekt modelləri məlumatları ayrı yaddaş sahələri arasında köçürmədən işləyə bilir. Bu quruluş gecikməni azaldır və eyni vaxtda daha çox tapşırığın icrasını sürətləndirir.

    İş stansiyasının gümüşü metal korpusu və tor formalı ön paneli var. Daşımağı asanlaşdırmaq üçün korpusa 2 iri tutacaq qoyulub. Prosessor, yaddaş və şəbəkə kartı qapalı maye sistemi ilə soyudulur. Şəbəkə avadanlığı üçün ayrıca ventilyator da var. Enerjini 80 PLUS Titanium sertifikatlı 1 600 Vt güc bloku verir. Yaddaş üçün hər biri 2 TB olan 2 NVMe disk qoyulub. Əlavə avadanlıq üçün 3 PCIe yuvası və 2 bölmə ayrılıb.

    “MiniMax M2.7” sınağında sistem 128 paralel axın üzrə saniyədə 4 793 çıxış tokeni yaradıb. Token süni intellekt modelinin emal etdiyi və yaratdığı mətnin kiçik hissəsidir. “GLM-5.2” modeli 215 GB məlumatı birbaşa vahid yaddaşda işləyib. Nəticədə adi kompüterlərdə böyük süni intellekt modellərini yavaşladan yaddaş gecikməsi azalıb.

    Cihazda hər biri 400 giqabit sürətli 2 şəbəkə portu var. Onların ümumi məlumat ötürmə sürəti 800 Gbit/s-dir. Bu portlarla 2 iş stansiyasını bir sistemdə birləşdirmək olur. Birləşdirilən qurğuların ümumi vahid yaddaşı 1 496 GB-a çatır. Beləliklə, tək iş stansiyasının yaddaşına sığmayan daha böyük süni intellekt modellərini də işlətmək olar.

    “GPT-OSS-120B” sınağında çıxış sürəti saniyədə 9 280 token olub. Ümumi emal sürəti saniyədə 45 000-dən çox tokenə çatıb. Sistem eyni vaxtda 128 süni intellekt agentini ciddi yavaşlama və nasazlıq olmadan işlədib. Kodlaşdırma, araşdırma və mətn hazırlayan onlarla agent işləyərkən enerji sərfiyyatı 1 000 Vt-a yaxınlaşıb. Korpus görünüşcə klassik “Apple Mac Pro” ilə müqayisə olunsa da, bu iş stansiyası adi yüksək səviyyəli kompüterlərdən xeyli güclüdür.