ASUS qatlana bilən monitorunu təqdim edib

     ASUS şirkətinin CES 2024 sərgisində təqdim etmiş olduğu daha bir yenilik ZenScreen Fold adlı portativ OLED monitor olub. Sözügedən monitor əsas fərqləndirici özəlliyi onun qatlana bilən olmasıdır. Yüngül və kompakt ölçülü olmasına baxmayaraq öz texniki imkanları baxımından o, flaqman monitorlardan heç də geridə qalmır. Beləliklə ZenScreen Fold 2560x1920 piksel keyfiyyətli 17.3 düym elastiki ekranla təchiz olunub. O, DCI-P3 rəng diapazonunun 100%-ni əhatə edir və DisplayHDR True Black 500 sertifikatına sahibdir. ASUS-un sözlərinə əsasən monitorun sahib olduğu damcı formalı şarnir konstruksiyası ekran üzərində qatlanma izlərini görünməz edir. Sözügedən monitor özündə bir neçə ədəd USB Type-C girişini və mini-HDMI girişini birləşdirir. ASUS ZenScreen Fold-un nə zaman və hansı qiymətə satışa çıxacağı açıqlanmayıb.