ASUS ROG audiofillər üçün gaming qulaqlığı təqdim etdi

    Technote.az "Engadget” platformasına istinadən bildirir ki, ASUS ROG oyunçular üçün nəzərdə tutulmuş, lakin audiofilləri də hədəfləyən yeni ROG Kithara adlı "gaming" qulaqlığını təqdim edib. Şirkət bu modeli yüksək səviyyəli audio cihazları ilə tanınan HiFiMan ilə birgə hazırlayıb.

    ROG Kithara ASUS-un ilk open-back dizayna malik planar magnetic gaming qulaqlığıdır. Qulaqlıqda oyun üçün xüsusi tənzimlənmiş 100 mm planar maqnit drayverlər istifadə olunur. Şirkətin sözlərinə görə, bu texnologiya geniş tezlik diapazonu, aşağı təhrif və yüksək detal səviyyəsi təqdim edir. ASUS bildirir ki, Kithara oyun zamanı ayaq səsləri, silahın doldurulması və məsafədən gələn hərəkət səsləri kimi incə audio ipuclarını aydın şəkildə ayırd edə bilir. Hətta xaotik döyüş anlarında belə bu səslər itmir ki, bu da qulaqlığı xüsusilə kompetitiv oyunçular üçün cəlbedici edir.

    Açıq arxa konstruksiya bas, orta və yüksək tezliklərin daha təmiz ayrılmasını təmin edir. Bu xüsusiyyət qulaqlığı təkcə oyun üçün yox, həm də musiqi dinləmək üçün uyğun edir. Model yüksək siqnal-səs nisbətinə malik boom mikrofon ilə təchiz olunub və audio ilə mikrofon üçün ayrıca siqnal xətləri kəsişmə (crosstalk) problemini minimuma endirir. ROG Kithara artıq satışdadır və qiyməti 300 ABŞ dolları təşkil edir.