Google ikonlarını yeniləyir

    Technote.az “The Verge” platformasına istinadən bildirir ki, Google 2025-ci ilin sonlarında başladığı yeni gradient ikon dizaynını daha çox tətbiqinə gətirməyə hazırlaşır. 9to5Google tərəfindən yayılan görüntülərə əsasən, şirkət əvvəlki vahid dairəvi və bütün rəngləri bir araya gətirməyə çalışan ikon üslubundan imtina edir.

    Yeni dizayn dili daha yumşaq keçidlər, daha yuvarlaq künclər və pastel tonlardan Google-un əsas rənglərinə doğru incə gradient keçidlərlə seçilir. Bu dəyişiklik artıq Google-un əsas “G” loqosunda, eləcə də Gemini, Photos və Maps kimi tətbiqlərdə özünü göstərməyə başlayıb. Məlumata görə, bu vizual yenilənmə eyni zamanda süni intellekt əsaslı funksiyaların artdığını da simvolizə edir.

     Yeni ikonlar əvvəlki illərin “flat” dizayn tendensiyasından uzaqlaşaraq daha canlı, oynaq və fərqli görünüş təqdim edir. Google Sheets, Slides, Forms, Sites və Keep kimi tətbiqlər klassik “şaquli kağız” formasını tərk edərək daha uyğun olan üfüqi dizayna keçir. Bu da istifadə təcrübəsini vizual olaraq daha məntiqli edir.

    Bir çox ikon istifadəçilər üçün daha seçilən və fərqli görünür. Məsələn, Chat tətbiqi əvvəlki çoxrəngli konturdan imtina edərək daha sadə və yaşıl tonlarda ikonla əvəz olunur. Bununla belə, bəzi dizaynlar hamı tərəfindən bəyənilmir. Xüsusilə Keep ikonunun görünüşü tənqid olunur.

      Yeni ikonların nə vaxt tam şəkildə istifadəyə veriləcəyi hələlik açıqlanmasa da, bu dəyişikliklərin yaxın zamanda bütün tətbiqlərə yayılması gözlənilir.