Google Pixel istehsalını tamamilə Çindən çıxarır

    Google 2027-ci ildən etibarən Pixel cihazlarının istehsalını tamamilə Çindən çıxarmağı planlaşdırır. Nikkei Asia-nın mənbələrə əsaslanan məlumatına görə, şirkət smartfon, ağıllı saat və simsiz qulaqlıqların istehsalını Vyetnam və Hindistana köçürmək niyyətindədir. Bu qərarın əsas səbəblərindən biri ABŞ və Çin arasında davam edən geosiyasi və iqtisadi gərginlikdir. Bununla belə, hesabatda Google-un qərarına səbəb olan konkret tarif, ixrac məhdudiyyəti və ya yeni qanunun adı çəkilmir. Google özü də planı hələ rəsmi şəkildə təsdiqləməyib.

    Əslində Google-un Çindən uzaqlaşması yeni proses deyil. Şirkətin Pixel istehsalının bir hissəsini Vyetnama köçürməsi ilə bağlı məlumatlar hələ 2019-cu ildən yayılırdı. Yeni hesabatda isə bildirilir ki, Google Pixel 11 seriyasını həm hazırlayıb, həm də tam şəkildə Vyetnamda istehsal edib. Bunun üçün şirkət yeni sınaq avadanlıqlarına və istehsal alətlərinə investisiya qoymalı, istehsal prosesini demək olar ki, sıfırdan qurmalı olub.

    Smartfon istehsalı ağıllı saat və qulaqlıq istehsalından daha mürəkkəb olduğuna görə, Pixel 11-in uğurlu istehsalı Google-a digər Pixel məhsullarını da Çindən çıxara biləcəyinə əminlik verib.Hindistan da yeni istehsal mərkəzlərindən biri olacaq. Ölkə son illərdə elektronika və smartfon istehsalını öz ərazisinə cəlb etmək üçün böyük investisiyalar və təşviq proqramları həyata keçirir.