Google Pixel Watch 3 smart saatının ilk render fotoları təqdim edilib

     Google şirkəti bu ilin ikinci yarısında Pixel 9 smartfonları ilə yanaşı üstəlik Pixel Watch 3 smart saatını da təqdim etməlidir. İndi isə OnLeaks ləqəbli məşhur insayder 91mobiles saytı ilə birlikdə Pixel Watch 3-ün ilk render fotolarını təqdim edib. Təqdim edilmiş render fotolardan da görmək olar ki, Pixel Watch 3 xarici görünüşcə Pixel Watch 2-nin kopyası olacaq. Qeyd etmək lazımdır ki, zamanında Pixel Watch 2 modeli də birinci nəsil Pixel Watch-un kopyası idi. Yəni Google artıq 3 nəsildir ki, öz smart saatının dizaynını dəyişməz olaraq saxlayır. İnsayderin sözlərinə əsasən Pixel Watch 3 smart saatı 1.2 düym ölçülü ekranla təchiz olunacaq. Bununla yanaşı məlumatda qeyd edilib ki, yeni smart saatın qalınlığı 14 mm təşkil edəcək. Müqayisə üçün qeyd etmək lazımdır ki, Pixel Watch 2-nin qalınlığı 12.3 mm təşkil edir. Yeni smart saatın daha qalın olmasının səbəbi onun daha böyük həcmli batareya ilə təchiz olunacağı ilə bağlı ola bilər.