Google-un Pixel Tablet planşeti artıq böyük mağazalarda satılmır

    “Google” 2023-cü ildə satışa çıxardığı “Pixel Tablet” modelini təxminən 3 il sonra səssizcə bazardan yığışdırmış ola bilər. Planşetin səhifəsi “Google Store” onlayn mağazasından silinib. Cihazı digər böyük satıcılardan da yeni məhsul kimi almaq olmur. Şirkət satışın dayandırılması ilə bağlı hələ rəsmi açıqlama verməyib.

    “Pixel Tablet” artıq “Amazon”da satılmır. “Best Buy” səhifəsində də cihazın yeni vəziyyətdə olmadığı yazılıb. Eyni vəziyyət planşetin aksesuarlarına da aiddir. “Speck SandyShell Case” qoruyucu qabını və “Charging Speaker Dock” adlı səsucaldanlı şarj stansiyasını “Google Store”dan almaq olmur. Səhifədə yalnız məhsullar yenidən satışa çıxarsa bildiriş almaq seçimi qalıb.

    “Pixel Tablet” 2023-cü ildə 399 dollardan (təxminən 680 manat) başlayan qiymətlə satışa çıxmışdı. Cihaz “iPad” qədər populyar olmasa da, “Google” və “Android” məhsullarını birlikdə işlədənlər arasında öz auditoriyasını tapmışdı. “Reddit” istifadəçiləri bu qərardan məyus olduqlarını yazırlar. Bununla yanaşı, “Google” cihazların satışını tez-tez dayandırdığı üçün təəccüblənmədiklərini də deyirlər.

    “Pixel Tablet 2” və hətta “Pixel Tablet 3” haqqında məlumatlar yayılsa da, “Google” bu modellərin heç birini satışa çıxarmadı. Daha sonra yeni planşetlərin istehsalının tam dayandırıldığı barədə xəbərlər gəldi. Bununla da növbəti nəsil modelə dair gözləntilər sona çatdı. “Pixel Tablet” şirkətin bu məhsul seriyasında satışa çıxardığı yeganə model olaraq qaldı.

    Bu addım “Google”ın “Nest Audio” səsucaldanlarını satışdan çıxarıb yenilənmiş “Google Home Speaker” modeli ilə əvəzləməsindən sonra gəlib. Şirkətin planşetlər üçün yeni plan hazırladığı, yoxsa bu bazardan tam çəkildiyi hələ aydın deyil. “Pixel Phone” və “Pixel Watch” sahibləri cihazların birlikdə rahat işləməsi imkanının zəifləyəcəyindən narahatdırlar.