“Android” əşyaların yerini treker olmadan yadda saxlayacaq

    “Google” sentyabr ayı üçün “Android” cihazlarına gələcək yeni funksiyaları açıqlayıb. Əsas yenilik “Find Hub” xidmətində vacib əşyaların yerini treker və əlavə aksesuar olmadan yadda saxlamaq imkanıdır. Məsələn, istifadəçi “Gemini”yə nadir hallarda işlətdiyi pasportun yataq otağındakı dolabın seyfində olduğunu deyə və qeydə foto əlavə edə biləcək. Əşya lazım olduqda onun yeri həm “Gemini” vasitəsilə soruşulacaq, həm də yadda saxlanmış əşyalar bölməsindən tapılacaq.

    “Find Hub” yeniliyi “Gemini” və xidmətin dəstəkləndiyi ölkələrdə “Android 16” və daha yeni cihazlarda işləyəcək. “Android 17” istifadəçiləri isə hərəkət xəstəliyini azaltmağa yönəlmiş “Motion Assist” funksiyasını əldə edəcəklər. Funksiya ekranda avtomobilin hərəkətinə uyğun yer dəyişən kiçik, şəffaf qabarcıqlar göstərir. Məqsəd gözün gördüyü görüntü ilə bədənin hiss etdiyi hərəkət arasındakı uyğunsuzluğu azaltmaqdır.

    İstifadəçilər “Motion Assist” qabarcıqlarının formasını, rəngini və şəffaflığını dəyişə biləcəklər. Funksiyanı avtomatik işə düşəcək şəkildə qurmaq və “Quick Settings” bölməsinə əlavə etmək də mümkün olacaq. “Google” həmçinin görmə məhdudiyyətli şəxslər üçün “Guided Vision” adlı vizual köməkçini təqdim edəcək. Bu imkan “Gemini” dəstəyi olan ölkələrdə “Android 9” və daha yeni cihazlarda işləyəcək.

    “Guided Vision” “Gemini Live” daxilində telefonun kamerasından istifadə edərək qarşıdakı obyektləri təsvir edir, etiket və menyulardakı kiçik yazıları səsləndirir. Funksiya dolabda konkret ərzağın tapılmasına da kömək edə bilir. Kamera düzgün istiqamətlənmədikdə istifadəçiyə səsli göstəriş veriləcək. Funksiyanı əlçatanlıq qısayollarına əlavə etmək və ya “TalkBack” menyusundan açmaq mümkün olacaq.

    Digər yeniliklər “Google Messages” və “Google Keep” inteqrasiyasını əhatə edir. Söhbət iştirakçıları ortaq alış-veriş siyahısı və ya səfər planı kimi qeydləri birbaşa çatda yarada, redaktə edə və tamamlaya biləcəklər. “Google Messages” üçün söhbət mövzuları da istifadəyə verilir. İstifadəçi hər söhbətə rəng və fon şəkli seçə biləcək, mətn qabarcıqlarının görünüşü isə seçilmiş fona avtomatik uyğunlaşacaq. Bu iki yenilik sentyabrın 1-dən istifadəçilərə təqdim olunur.