İddia: OnePlus ABŞ və Avropadan çıxmağa hazırlaşır

    OnePlus smartfon brendi yaxın günlərdə ABŞ və Avropa bazarlarından çıxacağını elan edə bilər. Bu barədə Almaniyanın WinFuture nəşri məlumat yayıb. Məlumata görə, OnePlus və onun ana şirkəti Oppo yaxın günlərdə şirkətin ABŞ və Avropa bazarlarındakı fəaliyyətini dayandıracağını açıqlamağa hazırlaşır. Hələlik şirkət tərəfindən bu iddialar rəsmi şəkildə təsdiqlənməyib.

    Əgər bu qərar gerçəkləşərsə, son aylarda OnePlus-un gələcəyi ilə bağlı yayılan çoxsaylı iddialar da təsdiqini tapmış olacaq. Belə ki, yanvar ayında Android Headlines OnePlus-un "mərhələli şəkildə ləğv edildiyini" iddia etmişdi. Lakin şirkət həmin vaxt açıqlamasında OnePlus North America bölməsinin fəaliyyətini davam etdirdiyini, istifadəçilər üçün satışdan sonrakı xidmətlərin, proqram yeniləmələrinin və digər öhdəliklərin tam şəkildə qorunacağını bildirmişdi.

    Mart ayında 9to5Google da OnePlus-un qlobal bazarlardakı fəaliyyətini dayandıra biləcəyi barədə məlumat yaymışdı. Apreldə isə Android Authority şirkətin Avropa və Böyük Britaniyadakı bir sıra yüksək vəzifəli əməkdaşlarının işdən ayrıldığını yazmışdı. OnePlus-un nümayəndəsi həmin vaxt Avropa bazarı üzrə strategiyanın yenidən qiymətləndirildiyini açıqlamışdı. Hazırda OnePlus və Oppo tərəfindən ABŞ və Avropa bazarlarından çıxışla bağlı rəsmi açıqlama verilməyib. Buna görə də yayılan məlumatlar hələlik iddia xarakteri daşıyır.