Orta qiymət segmentində rəqabət getdikcə kəskinləşir. Bu seqmentdə həm qiymət-həcm balansı, həm də istifadəçi təcrübəsini maksimum səviyyədə təmin edən modellər seçilir. Bu kontekstdə Infinix şirkəti yeni təqdim etdiyi Note 50 Pro modeli ilə həm texniki göstəriciləri, həm də istehsal fəlsəfəsi baxımından diqqətəlayiq addım atıb. Smartfon artıq Azərbaycanda satışdadır və 650 AZN qiymətə təqdim olunur. Bəs bu cihaz öz seqmentində hansı üstünlükləri ilə seçilir və alıcıya hansı dəyəri təqdim edir?

Infinix Note 50 Pro-nun ilk diqqətçəkən tərəfi onun qutusudur. Bir çox brenddə flaqman modellər belə minimum aksesuarla təqdim olunduğu halda, Infinix bu cihaz üçün zəngin və tam istifadə təcrübəsi yaratmağa çalışıb. Qutunun içərisində 90W adapter, USB Type-C kabel, MagPad adlandırılan naqilsiz enerji pad-i, dəri materiallı maqnit keys, ekran qoruyucu şüşə və Type-C qulaqlıq yer alır.

Şirkətin bu siyasəti təsadüfi deyil. Infinix rəsmilərinin açıqlamasına görə, onların əsas hədəf bazarlarından biri olan Afrika regionunda istifadəçilərin əksəriyyəti üçün əlavə aksesuar almaq iqtisadi baxımdan çətinlik yarada bilər. Bu səbəbdən də bütün əsas ehtiyaclar ilkin olaraq qutuya daxil edilir. Bu modelin Azərbaycanda da bu şəkildə təqdim olunması, alıcı üçün əlavə xərcləri minimuma endirir.

Cihazın dizaynında və material seçimində Infinix gözləntilərin üzərində bir nəticə təqdim edir. Arxa panel plastik olsa da, kənar çərçivələrdə alüminium, daxili soyutma sistemində isə poladdan istifadə olunub. Bu, həm davamlılıq baxımından, həm də əl hissiyatı baxımından cihazı daha premium səviyyəyə daşıyır. Cihazın qalınlığı cəmi 7.3 mm-dir ki, bu göstərici ilə smartfon seqmentində ən incə modellərdən biri sayılır.

Kamera blokunda yer alan “Flicker Sensor” və “Aktiv Halo RGB” işıq modulu həm texniki baxımdan, həm də dizayn olaraq fərqlilik yaradır. RGB işıqlar zəng, bildiriş, enerji yığma və digər əməliyyatlarda aktiv olur. Bundan əlavə, bu hissədə yerləşən sensorlar vasitəsilə ürək ritmi və oksigen saturasiyası da ölçülə bilir. Bu cür yanaşma, cihazı yalnız estetik baxımdan deyil, həm də funksional olaraq rəqiblərindən ayırır.

Infinix Note 50 Pro 5200 mAh həcmində batareyaya malikdir. Bu batareya 90W sürətli şarj texnologiyası ilə təchiz olunub və cəmi 30 dəqiqəyə 88% dolum təmin edir. Bu nəticə orta seqmentdə olduqca rəqabətlidir. Bundan əlavə, cihaz 30W naqilsiz enerji yığma funksiyasına da malikdir. Qutudan çıxan MagPad bu funksiyanı tam dəstəkləyir.

Şirkətin enerji idarəsi sahəsində təqdim etdiyi “bypass charging” funksiyası isə oyun və intensiv istifadə zamanı batareyaya yük vermədən birbaşa enerji təminatı ilə daha səmərəli nəticə təqdim edir. Eyni zamanda, cihazın 10W enerji ötürmə imkanı da var ki, bu sayədə digər cihazlara enerji vermək mümkündür.

Smartfonun texniki təchizatında MediaTek-in Helio G99 Ultimate prosessoru yer alır. Bu çipset 6nm texnologiya ilə hazırlanıb və gündəlik istifadə üçün sabit və enerjiyə qənaətcil performans təqdim edir. Prosessorun 5G dəstəyi olmasa da, Azərbaycanın hazırkı şəbəkə reallığı nəzərə alındıqda bu çatışmazlıq ciddi problem yaratmır.

Cihazda 12 GB fiziki RAM və əlavə 12 GB virtual RAM mövcuddur. Daxili yaddaş həcmi isə 256 GB təşkil edir və UFS 2.2 texnologiyası ilə təmin olunub. Bu da sürətli oxuma/yazma əməliyyatları üçün kifayət qədər əlverişlidir.

Infinix Note 50 Pro Android 15 əməliyyat sistemi ilə gəlir və şirkət bu model üçün Android 16 və 17 yenilənmələrini, eləcə də 3 illik təhlükəsizlik dəstəyi vəd edir. İstifadəçi interfeysi isə klassik Android stilində olsa da, daha sabit və optimallaşdırılmışdır.

Ekran baxımından cihaz 6.78 düymlük AMOLED panel ilə təchiz olunub. Bu panel Full HD+ keyfiyyətində görüntü təqdim edir, 144Hz yenilənmə tezliyi, 1300 nits pik parlaqlıq və 10-bit rəng dərinliyi ilə təchiz olunub. Ekranın yüksək tezlikdə çalışması oyun və animasiya baxımından daha axıcı təcrübə verir.

Optik barmaq izi sensoru da ekranın daxilində yerləşir. Testlərdə bu sensor sürətli və sabit işləmə performansı göstərib. Ekran kənarlardan bükülmədən, çox incə çərçivələrlə əhatə olunub və bu da cihazın vizual baxımdan daha modern görünməsini təmin edir.

Arxa kamera blokunda 50 MP əsas və 8 MP ultra geniş bucaqlı linzalar yer alır. Ultra geniş obyektiv eyni zamanda makro çəkimləri də dəstəkləyir. Əsas kamera f/1.9 diafraqma, PDAF avtofokus və OIS (optik sabitləmə) ilə təchiz olunub. Kamera 1080p/60FPS və 2K/30FPS video çəkilişi dəstəkləyir.

32 MP-lik ön kamera isə həm görüntü, həm də video baxımından seqment üçün olduqca yaxşı nəticələr verir. Portret, gecə rejimi və HDR rejimlərdə testlərdə qənaətbəxş nəticələr əldə olunub.

Infinix Note 50 Pro-nun AI əsaslı funksiyaları da diqqət çəkir. Cihazda Folax adlı səsli assistent var. Bu assistent Çin istehsalı DeepSeek R1 modelinin fərdiləşdirilmiş versiyasıdır. İstifadəçi həm Folax, həm də Google-un Gemini assistentini alternativ olaraq quraşdıra bilər.

Digər AI funksiyalar arasında “Circle to Search”, real vaxtda zənglərin tərcüməsi, AI əsaslı şəkil düzəlişləri, obyekt silmə və prompt əsasında şəkil generasiyası da mövcuddur. Bu cür funksiyalar, xüsusilə kontent yaradan və aktiv sosial media istifadəçiləri üçün faydalı ola bilər.

Infinix Note 50 Pro modeli qiymətinə və təqdim etdiyi imkanlara görə orta seqmentdə olduqca cəlbedici alternativdir. Qutunun zənginliyi, yüksək ekran tezliyi, sürətli enerji dəstəyi və süni intellekt əsaslı funksiyalar alıcıya flaqman hissiyatı yaşadır. Kamera performansı və dizayn yanaşması ilə də cihaz öz sinifində fərqlənməyi bacarır.

Çatışmazlıqlar arasında 5G dəstəyinin və tam suya davamlılığın olmaması göstərilə bilər. Lakin 650 AZN-lik qiymət kontekstində bu məqamlar qəbul edilə bilər səviyyədədir. Axtardığınız büdcə dostu, lakin funksional baxımdan zəngin bir cihazdırsa – Infinix Note 50 Pro bu tələbləri qarşılayacaq gücdədir.