Lenovo-dan futuristik yenilik: səs ilə idarə olunan və fırlanan noutbuk

    Technote.az “Mashable” platformasına istinadən bildirir ki, Lenovo CES 2026 sərgisində səsli idarəetmə ilə işləyən və avtomatik fırlanan ekranlı noutbukunu nümayiş etdirdi. ThinkBook Plus Gen 7 Auto Twist adlanan bu qeyri-adi biznes noutbuku iyun ayında satışa çıxacaq və başlanğıc qiyməti 1 649 dollar olacaq.

    Noutbuk hələ satışa çıxmamışdan əvvəl bir neçə xırda texniki detal üzərində işlənilsə də, ümumilikdə Auto Twist klassik 2-in-1 dizaynına yaradıcı və funksional yanaşma kimi qiymətləndirilir. ThinkBook Plus Gen 7 Auto Twist 14 düymlük sensor ekranla təchiz olunub və bu ekran motorlu menteşə vasitəsilə avtomatik fırlana bilir. İstifadəçi ekranı həm əllə, həm də səsli əmrlərlə idarə edə bilər. Sadəcə “Hey Tiko” deyərək ekranı açmaq, bağlamaq və ya planşet rejiminə keçirmək mümkündür. Ekran sağa doğru 90°, sola isə tam 180° fırlana bilir.

    Cihazın diqqətçəkən xüsusiyyətlərindən biri də 10 MP-lik ağıllı veb-kameradır. Kamera istifadəçinin üzünü izləyir və əgər siz kadrdan kənara çıxmağa başlasanız, noutbuk ekranı avtomatik olaraq mövqeyini dəyişir. Bu funksiya xüsusilə təqdimatlar və video görüşlər üçün olduqca faydalıdır.

    Bundan əlavə, Auto Twist “Desk View” adlı süni intellekt əsaslı funksiyanı da dəstəkləyir. Kamera ətrafdakı obyektləri analiz edə, sənədləri skan edə və hətta ölçü və təxmini qiymət barədə məlumat verə bilir. Lenovo nümayəndəsinin təqdimat zamanı göstərdiyi demo zamanı cihaz masanın üzərindəki spesifikasiya kartını taparaq oxuyub, eləcə də qarşısında tutulan dəftərin ölçüsünü və qiymət aralığını düzgün müəyyən edib.