Lenovo Legion R9000P 2024 gaming noutbuku təqdim edilib - QİYMƏTİ

Cihazlar+

23.07.2024

Emil Nəcəfov

Lenovo şirkəti öz yeni gaming noutbukunu təqdim edib. Şirkətin yeni gaming noutbuku Lenovo Legion R9000P 2024 adlanır. Bu yeni noutbuk AMD prosessoru və NVIDIA videokartı ilə seçilir. Beləliklə Lenovo Legion R9000P 2024 noutbuku 240 Hz-lik təsvir yenilənməsinə sahib 2.5K keyfiyyətli 16 düym ölçülü ekranla təchiz olunub. Ekranın maksimal parlaqlıq səviyyəsi 500 nit, istifadəçi əməliyyatlarına reaksiya müddəti isə 3 millisaniyə təşkil edir. Üstəlik ekran NVIDIA G-SYNC, AMD FreeSync Premium, Dolby Vision texnologiyalarının dəstəklərinə və zərərli göy işığın aşağı səviyyədə olmasına dair TÜV Rheinland sertifikatına sahibdir.

Noutbuk AMD Ryzen 9 7945HX prosessoru vasitəsilə çalışır və özündə NVIDIA GeForce RTX 4060 videokartını birləşdirir. Bu yeni noutbuk DDR5 standartlı 16 GB RAM-ı və 1 TB-lıq SSD-ni əldə edib. Onun batareya həcmi isə 80 vatt-saat təşkil edir. Lenovo Legion R9000P 2024 özündə USB-C, USB-A, HDMI 2.1 girişlərini birləşdirir. Noutbuk 28 iyul tarixində Çində satışa çıxacaq. Onun boz rəngdə gövdəyə sahib versiyası 1290$-a, ağ rəngdə gövdəyə sahib versiyası isə 1333$-a satılacaq. Lenovo Legion R9000P 2024-ün qlobal bazarda satılıb-satılmayacağı bilinmir.

Linki kopyala

lenovo

lenovo legion r9000p 2024