Lenovo Tab Plus Gen 2 təqdim olundu

    Lenovo iki il əvvəl təqdim etdiyi Tab Plus planşetinin yeni nəslini elan edib. Tab Plus Gen 2 adlanan model əsas diqqəti yenə də multimedia təcrübəsinə yönəldərək daha güclü səs sistemi və yenilənmiş dizaynla istifadəçilərin qarşısına çıxır. Yeni planşetin ən diqqətçəkən xüsusiyyəti arxa hissəsində yerləşən iri dinamik moduludur. İlk nəsildə səkkiz daxili dinamik üçün 13,58 mm qalınlığında çıxıntı istifadə olunurdusa, yeni modeldə bu hissə 22,7 mm qalınlığa çatdırılıb və ümumilikdə doqquz dinamiklə təchiz edilib. Lenovo bu qalınlığı daha funksional etmək üçün dinamik moduluna 360 dərəcə fırlana bilən qatlanan dayaq əlavə edib. Bu dayaq planşetin həm şaquli, həm də üfüqi vəziyyətdə rahat istifadəsinə imkan yaradır.

    Texniki xüsusiyyətlər də yenilənib. Qurğu MediaTek Dimensity 7400 prosessoru ilə təchiz olunub və 6 GB-dan 12 GB-a qədər RAM, 128 GB və ya 256 GB daxili yaddaş variantları ilə satışa çıxacaq. microSD kart dəstəyi sayəsində yaddaşı 2 TB-a qədər artırmaq mümkün olacaq. Planşet 12,1 düymlük, 120 Hz yenilənmə tezliyinə malik 2.5K LCD ekran, 10 200 mAh batareya və 15 saata qədər YouTube izləmə imkanı təqdim edir. Ön kamera 8 MP olaraq qalsa da, arxa kamera 13 MP-ə yüksəldilib.

    Tab Plus Gen 2 qutudan Android 16 əməliyyat sistemi ilə çıxacaq. Lenovo cihaz üçün iki il Android yeniləməsi və dörd il təhlükəsizlik yeniləmələri təqdim edəcəyini açıqlayıb. Şirkət planşetin satış tarixini hələ açıqlamayıb, lakin onun yaxın zamanda seçilmiş qlobal bazarlarda satışa çıxacağını bildirib. Yeni modelin başlanğıc qiyməti isə 399,99 ABŞ dolları olacaq.