Nazik gövdəli Samsung Galaxy S25 Edge anons edilib

     Keçən ilin ikinci yarısından dünənki Galaxy Unpacked 2025 tədbirinə qədər olmuş məlumat sızıntılarında qeyd edilirdi ki, Samsung şirkəti Galaxy S25 smartfon seriyası çərçivəsində dördüncü modeli təqdim edəcək. Söhbət, nazik gövdəli Galaxy S25 Slim-dən gedirdi. Lakin dünən gecə baş tutmuş Galaxy Unpacked 2025 tədbiri çərçivəsində təqdim edilmiş Galaxy S25 seriyasına yalnız 3 model daxil oldu. Galaxy S25, S25+ və S25 Ultra. Bununla belə şirkət təqdimatın sonunda kiçik bir sürpriz edib. Belə ki, Samsung həqiqətən də nazik gövdəli smartfonunu anons edib. Lakin anons edilmiş smartfon Galaxy S25 Slim deyil, Galaxy S25 Edge adlanır.

     Şirkət Galaxy S25 Edge smartfonunun tam təqdimatını keçirtmədi. Şirkət təqdimatdan sonra sözügedən smartfonun xarici görünüşünü jurnalistlərə sərgiləyib. Təqdim edilmiş fotolardan da görmək olar ki, anons edilmiş Galaxy S25 Edge smartfonu yastı gövdə dizaynını və yuvarlaq künc hissələri əldə edib. Onun arxa panelində isə iki ədəd kamera yerləşib. Samsung bu nazik gövdəli smartfonun texniki imkanları barəsində heç bir məlumat verməyib. Onun tam şəkildə təqdimatının nə zaman baş tutacağı da aydın deyil. Ola bilsin ki, bu, cari ilin ikinci yarısında baş versin. İnsayderlərin sözlərinə əsasən Galaxy S25 Edge modelinin gövdə qalınlığı 6.4 mm təşkil edəcək. Müqayisə üçün qeyd etmək lazımdır ki, yenicə təqdim edilmiş adi Galaxy S25 modelinin gövdə qalınlığı 7.2 mm təşkil edir.