Nvidia GeForce 8800 videokartlarının 20 illiyi üçün demo təqdim etdi

    “Nvidia” 8 noyabr 2006-cı ildə satışa çıxardığı “GeForce 8800 GTX” və “GeForce 8800 GTS” videokartlarının 20 illiyini qeyd edir. Şirkət bu münasibətlə “GeForce 8800 GTX - 20 Years of a Legend” adlı interaktiv demo yayımlayıb. Köhnə videokartın qutudan çıxarılmasını canlandıran proqram “Steam”də pulsuzdur.

    Demonun sistem tələbləri müasir kompüterlər üçün də xeyli yüksəkdir. Normal işləməsi üçün ən azı “RTX 4070”, tövsiyə olunan səviyyə üçün “RTX 5080” lazımdır. Kompüterdə həmçinin 32 GB RAM və 30 GB boş yaddaş olmalıdır. Bu tələblərə uyğun kompüteri olmayanlar nümayiş videosuna baxa bilərlər.

    “Unreal Engine” ilə hazırlanan demoda “path tracing” işlədilir. Bu üsul işığın hərəkətini ətraflı hesablayaraq daha real görüntü yaradır. Proqramda DLSS 4.5, “Dynamic Multi Frame Generation”, “Ray Reconstruction” və “Mega Geometry” texnologiyaları da var. Onların köməyi ilə 2006-cı ilin üslubu müasir işıqlandırma və daha detallı qrafika ilə yenidən qurulub.

    Proqramı xüsusi effektlər üzrə baş rəssam Dylan Browne hazırlayıb. İstifadəçi virtual otaqda qutuya baxa, sonra videokartı həmin dövrə uyğun kompüter korpusuna yerləşdirə bilər. Demoda gizli sürprizlər də var. Məsələn, ekrandakı kompüterdə “Windows Vista” görünür. Halbuki bu əməliyyat sistemi videokartdan bir neçə ay sonra satışa çıxmışdı.

    “GeForce 8800 GTX”də qrafik təsviri emal edən 128, “GeForce 8800 GTS”də isə 96 şeyder bloku vardı. “Nvidia” “GeForce 8800 GTX” modelini 599 dollara (təxminən 1020 manat) satırdı. “GeForce 8800 GTS”in qiyməti 449 dollar (təxminən 760 manat) idi. G80 arxitekturalı bu videokartlar DirectX 10 dövrünün başlanğıcında oyunlarda daha sürətli qrafika və yeni görüntü imkanları açırdı.

    G80 arxitekturası CUDA-nı adi istifadəçilər üçün əlçatan etdi. Beləliklə, qrafik prosessorlardan yalnız görüntü yaratmaq üçün deyil, başqa hesablamalarda da yararlanmağın yolu açıldı. “Nvidia” bu videokartlara sürücü dəstəyini təxminən 10 il sonra dayandırdı. Həmin vaxt DirectX 11 avadanlıqları və oyunları geniş yayılmışdı, köhnə modellər də yeni AAA oyunları üçün yetərsiz qalırdı.