Parallels Desktop 27 təqdim edildi

    Parallels şirkəti Mac kompüterlərində Windows və Linux əməliyyat sistemlərini virtual şəkildə işlətməyə imkan verən Parallels Desktop 27 versiyasını təqdim edib. Yeni versiyanın əsas yenilikləri qrafik performansının yüksəldilməsi və süni intellekt tapşırıqlarının sürətləndirilməsidir. Parallels Desktop 27-də Windows virtual maşınları üçün Metal əsaslı yeni qrafik drayver istifadə olunur. Bunun sayəsində proqram artıq OpenGL 4.3 dəstəyinə malikdir və Blender 4.3, ArcGIS Pro və ZWCAD kimi daha tələbkar Windows proqramlarını Mac-də işlətmək imkanlarını genişləndirir.

    Şirkətin məlumatına görə, M3 və daha yeni Apple prosessorları ilə təchiz edilmiş Mac-lərdə OpenGL performansı Parallels Desktop 26 ilə müqayisədə 160%-ə qədər yüksələ bilər. ArcGIS Pro-da 3D render performansının isə 35 %-ə qədər artdığı bildirilir. Parallels Desktop 27-nin digər mühüm yeniliyi M4 və daha yeni prosessorlu Mac-lərdə Scalable Matrix Extension (SME) texnologiyasının dəstəklənməsidir. Bu imkan həm Windows, həm də Linux virtual maşınlarında istifadə oluna bilər.

    SME xüsusilə lokal şəkildə süni intellekt modelləri ilə işləyən proqramçılar üçün nəzərdə tutulub. Parallels bildirir ki, Ollama və llama.cpp kimi alətlərdən istifadə zamanı AI və maşın öyrənməsi üçün matris əməliyyatlarının performansı əvvəlki versiya ilə müqayisədə 7 dəfəyə qədər, neyron şəbəkələrinin inferensiya sürəti isə 1,75 dəfəyə qədər arta bilər. Yeni versiyada şirkətlər üçün idarəetmə imkanları da genişləndirilib. Xüsusilə Jamf istifadə edən təşkilatların çoxsaylı Parallels Desktop quraşdırmalarını idarə etməsi üçün əlavə alətlər təqdim olunub.