Realme Harry Potter mövzulu smartfon və qulaqlıq təqdim etdi

    “Realme” şirkəti “Realme 16 Pro Harry Potter Edition” smartfonunu rəsmən göstərib. Modelin əsas fərqi arxa paneldəki xüsusi gerbdir. UV işığı düşəndə gerbdə Hogwarts məktəbinin 4 fakültəsini təmsil edən rənglər görünür. Şirkət bunu dünyada ilk 4 hissəli, işığa görə rəng dəyişən texnologiya adlandırır.

    Smartfonun qəhvəyi arxa paneli qabarıq və şahmat naxışlıdır. Çərçivəyə “Welcome to Hogwarts” sözləri həkk olunub. Kamera hissəsinin dizaynı “Hedwig” adlı bayquşdan götürülüb. Telefonun menyusuna xüsusi ikonlar, ekran şəkilləri, divar kağızları və kamera filtrləri əlavə edilib. Bu, “Warner Bros.” ilə birlikdə hazırlanmış 2-ci “Realme” smartfonudur.

    “Realme 16 Pro Harry Potter Edition” xüsusi hədiyyə qutusunda satılacaq. Hogwarts çamadanına bənzəyən bu dəstdən dünyada cəmi 5000 ədəd buraxılacaq. Qutuda qəbul məktubu, 9¾ platforması üçün qatar bileti, əlfəcinlər və personajların açıqcaları var. Dəstə xüsusi qoruyucu örtük və SIM kart yuvasını açan alət də daxildir.

    Telefonun texniki göstəriciləri standart “Realme 16 Pro” ilə eynidir. Smartfonun 6,78 düymlük AMOLED ekranı 144 Hz yenilənmə tezliyində işləyir, buna görə görüntü keçidləri daha hamar görünür. Əsas kamera 200 MP-dir. Telefonda “Dimensity 7300 Max” prosessoru və 7000 mAh batareya var. 12 GB RAM və 256 GB yaddaşlı versiya 62 999 Hindistan rupisinə satılacaq.

    “Realme Buds T500 Pro Harry Potter Edition” qulaqlığı da eyni mövzuda hazırlanıb. Qəhvəyi şarj qutusunda Hogwarts gerbi və “Harry Potter” dünyasından götürülmüş başqa dizayn detalları var. Texniki göstəricilər standart “Realme Buds T500 Pro” ilə eynidir. Qulaqlığın qiyməti 6999 Hindistan rupisidir. Hər 2 məhsul sentyabrın 23-də satışa çıxacaq.