REDMI Turbo 4 Pro-nun əsas imkanları açıqlanıb

     REDMI brendi keçən ayın əvvəlində Turbo 4 adlı smartfonunu təqdim etmişdi. İndi isə Turbo 4 Pro modeli təqdimata hazırlaşır. Sızdırılmış yeni məlumatlara görə, bu model daha güclü prosessor və daha böyük həcmli batareya ilə təchiz ediləcək. Digital Chat Station ləqəbli məşhur insayder öz növbəsində REDMI Turbo 4 Pro-nun əsas texniki xüsusiyyətlərini bölüşüb.

     Beləliklə insayderin sözlərinə əsasən REDMI Turbo 4 Pro smartfonu, 2025-ci ilin ikinci rübündə təqdim olunacaq Snapdragon 8s Elite prosessoru ilə təchiz ediləcək. Bu prosessor, Snapdragon 8 Gen 2 və Snapdragon 8 Gen 3 arasında yerləşir və təkmilləşdirilmiş CPU və Adreno GPU arxitekturasına malikdir. Bu yenilik, cihazın çoxnüvəli testlərdə yüksək nəticələr göstərməsini təmin edəcək, onu orta və yüksək sinifdə güclü bir modelə çevirəcək.

     REDMI Turbo 4 Pro-nun əsas üstünlüklərindən biri 7500 mAh enerji tutumlu batareyası olacaq. Bu da onu REDMI-nin orta seqmentində ən böyük batareyaya malik modelə çevirəcək. Bundan əlavə, smartfon 90 vatt gücündə sürətli şarj texnologiyasını dəstəkləyəcək. Cihaz 1.5K keyfiyyətli 6.67 düym ölçülü OLED ekran və yeni nəsil barmaq izi skaneri ilə təchiz ediləcək. Smartfonun kamera xüsusiyyətləri aşağıdakı kimi olmalıdır:

- 50 MP əsas kamera (optik stabilizasiya dəstəkli)

- 8 MP ultra geniş bucaqlı kamera.

     Bundan başqa, REDMI Turbo 4 Pro metal materialdan hazırlanmış gövdə ətrafı çərçivəyə malik olacaq və onun gövdəsi IP68 standartı üzrə sudan və tozdan qorunma imkanını özündə birləşdirəcək.

Mənbə: Digital Chat Station