Samsung Galaxy istifadəçiləri üçün rəqəmsal ev açarı dövrü başlayır

    Technote.az "Engadget” platformasına istinadən bildirir ki, Samsung istifadəçilər üçün yeni bir funksiyanı istifadəyə verib. Şirkət Samsung Wallet tətbiqi daxilində “Digital Home Key” adlı yeniliyi təqdim edib. Bu funksiya sayəsində uyğun ağıllı qapı kilidlərini birbaşa telefon vasitəsilə açmaq mümkün olacaq.

    Samsung Wallet indiyədək rəqəmsal avtomobil açarlarını dəstəkləyirdi. İndi isə bu imkan evlər üçün də genişləndirilir. Yeni sistem uyğun smart kilidlərə sahib istifadəçilərə fiziki açar daşımadan qapını açmağa imkan verəcək. Digital Home Key funksiyası Connectivity Standards Alliance tərəfindən yaradılmış Aliro adlı sənaye standartlı kommunikasiya protokoluna əsaslanır. Bu standart müxtəlif istehsalçıların cihazları arasında təhlükəsiz və stabil əlaqəni təmin etməyi hədəfləyir.

    Samsung bildirir ki, sistem EAL6+ təhlükəsizlik sertifikasiyası tələblərinə cavab verir. Bundan əlavə, ev qapısını açmaq üçün biometrik təsdiq (barmaq izi və ya üz tanıma) və ya PIN kod tələb olunacaq. Əgər telefon itərsə, istifadəçi funksiyanı uzaqdan deaktiv edə və ya silə bilər. Bu proses Samsung Find xidməti vasitəsilə həyata keçirilir.