Samsung Galaxy S23 FE-nin real fotosu ortaya çıxıb

    Dünən Samsung şirkətinin təmsilçisi rəsmi şəkildə təsdiqlədi ki, şirkət bu il ərzində Galaxy S23 FE smartfonunu təqdim edəcək. İndi isə sözügedən smartfonun real fotosunun Wireless Power Consortium-un (WPC) saytında ortaya çıxdığı məlum olub. WPC saytında Galaxy S23 FE smartfonu SM-S711U model nömrəsi ilə ortaya çıxıb. Smartfonun real fotosundan görmək olar ki, o tamamilə yastı ekrana sahib olacaq.

    Bununla yanaşı smartfonun aşağı hissəsindəki çərçivə kənar hissələrdəki çərçivələrdən daha qalın olacaq. Yandırıb/söndürmə və səsin tənzimlənməsi düymələri gövdənin sağ tərəfində yerləşəcəklər. Son məlumat sızıntılarına əsasən Galaxy S23 FE 120 Hz-lik təsvir yenilənməsinə sahib 6.4 düym ekran, Exynos 2200 prosessoru, 8 GB RAM, 50 MP + 12 MP + 8 MP üçlü arxa kamera və 25 vatt gücündə sürətli şarj texnologiyalı 4500 mAh enerji tutumlu batareya ilə təchiz olunacaq.