Samsung Galaxy Watch 9 və Galaxy Watch Ultra 2 təqdim olundu

    Samsung növbəti nəsil ağıllı saatları olan Galaxy Watch 9 və Galaxy Watch Ultra 2 modellərini rəsmi olaraq təqdim edib. Bu il şirkət yeni Galaxy Watch Classic modelini təqdim etməyib və seriya yalnız iki modeldən ibarət olub. Galaxy Watch 9 40 mm və 44 mm ölçülərində satışa çıxacaq. Bluetooth versiyasının qiyməti 379,99 dollar, LTE dəstəkli variantın qiyməti isə 429,99 dollar təşkil edir. Galaxy Watch Ultra 2 isə yalnız 47 mm ölçüdə təqdim olunub və 699,99 dollar qiymət etiketi ilə satışa çıxacaq. Texniki xüsusiyyətlərə gəldikdə, Galaxy Watch 9-un 44 mm versiyası 445 mAh, 40 mm modeli isə 390 mAh batareya ilə təchiz edilib. Galaxy Watch Ultra 2 isə 800 mAh batareyası ilə seriyanın ən uzun enerji ömrü vəd edən modeli olub. Hər iki ağıllı saat Snapdragon Wear Elite prosessoru ilə işləyir və 2 GB RAM təklif edir. Daxili yaddaş isə modellərə görə fərqlənir: Galaxy Watch 9 32 GB, Galaxy Watch Ultra 2 isə 64 GB yaddaşa malikdir.

    Ekran parlaqlığında da fərq var. Galaxy Watch Ultra 2 5 000 nit maksimum parlaqlıq təqdim edərək günəş altında daha rahat istifadəni hədəfləyir. Galaxy Watch 9-da isə bu göstərici 3 000 nit təşkil edir. Samsung xüsusilə Galaxy Watch Ultra 2 modelinə açıq hava idman növləri üçün yeni funksiyalar əlavə edib. Trail Run rejimi qaçış və yürüş zamanı relyef və hündürlük dəyişikliklərini izləyir. Nutrition Alert funksiyası isə istifadəçinin tər itkisindən çıxış edərək nə vaxt və nə qədər maye qəbul etməli olduğunu müəyyənləşdirir. Bundan əlavə, saat sualtı dalış üçün də uyğunlaşdırılıb və şirkət ilin sonuna qədər xüsusi Diving tətbiqini təqdim edəcəyini açıqlayıb.

    Hər iki modeldə süni intellekt əsaslı sağlamlıq funksiyaları da yenilənib. Saatlar yuxu zamanı nəfəs pozuntularını, həyati göstəricilərdəki dəyişiklikləri, gündəlik tövsiyə olunan kardio yükünü və qulağa zərər verə biləcək yüksək səs səviyyələrini analiz edərək istifadəçiyə fərdiləşdirilmiş xəbərdarlıqlar təqdim edir. Samsung-un yeni ağıllı saatları dizayn baxımından böyük dəyişikliklər təqdim etməsə də, daha güclü batareya, yeni prosessor və süni intellektlə dəstəklənən sağlamlıq imkanları ilə əvvəlki nəsillə müqayisədə daha funksional təcrübə vəd edir.