Universal və Concord Anthropic-i məhkəməyə verdi

    Technote.az “Engadget” platformasına istinadən bildirir ki, Anthropic şirkəti 3 milyard dollara qədər təzminat tələbi ilə məhkəməyə verilib. Reuters-in məlumatına görə, iddiaya Universal Music Group və Concord Music Group rəhbərlik edir. İddiada bildirilir ki, Anthropic müəllif hüquqları ilə qorunan 20 mindən çox musiqi əsərini, o cümlədən notlar, mahnı sözləri və musiqi kompozisiyalarını qanunsuz şəkildə yükləyərək öz süni intellekt çatbotu Claude-un təlimində istifadə edib.

    Universal Music iddiada The Rolling Stones, Neil Diamond və Elton John kimi dünya şöhrətli ifaçıların əsərlərinin də bu siyahıya daxil olduğunu vurğulayır. Concord isə Common, Killer Mike və Korn kimi sənətçilərin kataloqunu təmsil edir. Naşirlər bildirir ki, mümkün təzminat məbləği 3 milyard dolları keçə bilər və bu da işi ABŞ tarixində ən böyük qeyri-kollektiv müəllif hüquqları iddialarından birinə çevirir. İddia sənədində Anthropic-in özünü “təhlükəsizlik və tədqiqat yönümlü AI şirkəti” kimi təqdim etməsinə baxmayaraq, biznesinin pirat məzmun üzərində qurulduğu açıq şəkildə qeyd olunur.

    Qeyd edək ki, bu məhkəmə işi, ötən il başa çatan Bartz v. Anthropic işi ilə eyni hüquq komandası tərəfindən aparılır. Həmin işdə məhkəmə Anthropic-in müəllif hüquqları ilə qorunan mətnləri pirat yolla əldə etdiyini təsdiqləmiş və şirkət 1,5 milyard dollar ödəməyə məhkum edilmişdi. Hakim William Alsup o zaman belə qərara gəlmişdi: müəllif hüquqları olan məzmunla AI modeli öyrətmək mümkündür, lakin bu məzmunu pirat yolla əldə etmək qanunsuzdur. Yeni iddianın taleyi də məhz bu hüquqi presedent əsasında müəyyənləşə bilər.