Xiaomi şirkəti 4 smartfon modelinin dəstəyinin dayandırıldığını elan edib. Dəstəyi dayandırılmış smartfonlar EOS (End of Support) siyahısına daxil olublar. Bu dəfə şirkət 3 ədəd Redmi modelinin və 1 ədəd POCO modelinin dəstəyini dayandırıb. Söhbət, Redmi 8, Redmi 8A, Redmi K30 5G və POCO X2 smartfonlarından gedir. Qeyd etmək lazımdır ki, POCO X2 smartfonunun istifadəçiləri son ana qədər MIUI 13 istifadəçi interfeysini əldə edəcəklərinə ümid bəsləyirdilər. Lakin sözügedən smartfonun dəstəyinin dayandırılması o deməkdir ki, POCO X2 modeli dəqiq şəkildə MIUI 13-ü əldə etməyəcək.

    Maraqlısı ondadır ki, MIUI 13-ün stabil versiyası POCO X2-də hələ bu ilin aprel ayında test edilmişdi. Lakin nəticə olaraq şirkət istifadəçi interfeysinin bu versiyasını sözügedən smartfon üçün istifadəyə verməkdən imtina etdi. Qeyd etmək lazımdır ki, dəstəyi dayandırılmış smartfonlar kiberhücumlara və digər proqram təminatı problemlərinə daha həssas olurlar. Belə ki, sözügedən smartfonlar üçün artıq heç bir təhlükəsizlik yenilənməsi təqdim edilmir. Bu səbəbdən də dəstəyi dayandırılmış smartfonların istifadəçiləri daha yeni modellərə keçid etmək barəsində düşünməlidirlər.