BYD 5 dəqiqəlik şarj texnologiyasını təqdim etdi

     Technote.az “TechCrunch” platformasına istinadən bildirir ki, BYD elektrik avtomobilləri üçün yeni batareya texnologiyasını təqdim edib. Şirkətin açıqlamasına görə, yeni batareya cəmi 5 dəqiqəyə 10 %-dən 70 %-ə qədər enerji toplaya bilir, tam doldurulması isə əlavə təxminən 4 dəqiqə çəkir.

     Belə sürətli enerji doldurma elektrik avtomobilləri ilə bağlı ən böyük problemlərdən biri hesab edilən uzun şarj müddətini demək olar ki, aradan qaldıra bilər. Şirkət bildirir ki, batareya hətta –20°C soyuqda belə 20 %-dən 97 %-ə qədər 12 dəqiqədən az vaxtda doldurula bilir.

    Yeni sistem Blade Battery 2.0 adlanır və ilk dəfə Yangwang U7 adlı lüks sedan modelində istifadə olunacaq. Bu təsirli nəticənin isə vacib bir şərti var. Avtomobil yalnız BYD-in yeni “Flash Charging” adlı xüsusi şarj stansiyalarında bu sürətə çata bilir. Yəni standart elektrik avtomobil şarj cihazları ilə bu qədər sürətli enerji doldurmaq mümkün deyil.

     Yeni “Flash Charging” sistemi 1,5 meqavat gücündə enerji ötürə bilir. Müqayisə üçün, ABŞ və Avropada ən sürətli şarj stansiyalarının çoxu təxminən 350 kVt, bəzi yeni modellər isə 500 kVt gücündədir. BYD hazırda Çində 4 200 belə şarj stansiyası qurduğunu və ilin sonuna qədər bu sayını 16 000 daha artırmağı planlaşdırdığını açıqlayıb.

    Blade Battery 2.0 litium-dəmir-fosfat (LFP) kimyasına əsaslanır. Bu texnologiya kobalt və nikel kimi bahalı metallardan istifadə etmədiyi üçün elektrik avtomobillərinin qiymətini azaltmağa kömək edə bilər. Məlumatlara görə, LFP batareyalarının istehsal dəyəri kVt/saat üçün təxminən 81 dollar, daha çox istifadə olunan NMC batareyalarında isə 128 dollar təşkil edir.

     Buna baxmayaraq, LFP batareyalarının enerji sıxlığı bir qədər aşağıdır, bu isə avtomobilin bir şarjla qət edə biləcəyi məsafəni məhdudlaşdıra bilər. Yangwang U7 modeli Çin test standartına görə 1000 kilometrdən çox məsafə qət edə bilir. Lakin real sürüş şəraitində bu göstəricinin təxminən 400 mil (640 km ətrafı) olacağı ehtimal edilir.

     Bununla belə, cəmi 5 dəqiqəyə 240 mil (təxminən 386 km) məsafə üçün enerji toplamaq imkanı elektrik avtomobilləri bazarında ciddi rəqabət üstünlüyü yarada bilər.