BYD elektromobilini 3 dəfə ildırım vurub, lakin nəqliyyat çalışmağa davam edib (VİDEO)

     Litium batareyalı, maye elektrolitli elektromobillərlə bağlı əsas qorxulu hekayələrdən biri onların yüksək yanğın təhlükəsi ilə əlaqədar rəvayətlərdir. Lakin məlum olur ki, xarici təbii mənbələrdən gələn elektrik boşalmalarının təsiri elektromobildə olan insanlar üçün hər zaman ciddi nəticələrə səbəb olmur. Çində şahidlər BYD Song Plus elektromobilinin tavanına ildırım düşmə anını çəkə biliblər və avtomobil təbiət hadisəsinin 3 ardıcıl zərbəsinə tab gətirib. Qonşu avtomobilin qeydiyyat cihazı ilə çəkilmiş videoda ildırımın 3 dəfə elektromobilin tavanına düşməsi və qövs boşalmalarının yaranması müşahidə olunur.

     Hadisədən sonra elektromobil sahibi rəsmi servis mərkəzinə müraciət edib və elektromobili yoxlamış mütəxəssislər hərəkət sistemlərinə zərər verəcək hər hansı nasazlıq aşkar etməyiblər. Eyni zamanda, gövdənin xarici baxışı zamanı nəqliyyat vasitəsinin damında elektrik cərəyanının təsirindən yaranmış iki zədələnmə aşkar edilib. Bununla belə, bort elektronikasına, eləcə də dartı batareyasına və güc qurğusunun elementlərinə zərər dəyməyib. Mütəxəssislər izah edirlər ki, metaldan hazırlanmış panellərdən ibarət olan hermetik gövdə ildırımın təsiri mövzusunda nisbətən təhlükəsiz obyekt sayılır, çünki Faradey qəfəsi effekti yaradır.

     Elektrik boşalması gövdənin xarici panelləri boyunca yerə ötürülür və maşında olan insanlar üçün ciddi təhlükə yaratmır. Bu kimi hallarda sərnişinlərə və sürücüyə ildırım vurduqdan dərhal sonra nəqliyyat vasitəsinin salonunu tərk etməmək, əvvəlcə ətrafı yoxlamaq və bu hərəkətin təhlükəsiz olduğuna əmin olmaq tövsiyə olunur. Yanğın və ya tüstülənmə olmadığı halda avtomobili ildırımın son zərbəsindən ən azı 30 dəqiqə sonra tərk etmək məsləhətdir. İldırım zamanı bortdakı bütün elektron sistemləri söndürmək, mühərriki dayandırmaq, gövdənin xarici panellərindəki çıxıntılı antenaları yığmaq və salonun daxili məkanını xarici mühitdən təcrid etmək üçün pəncərələri tam bağlamaq lazımdır.