Samsung Wallet rəqəmsal Porsche açar dəstəyini işə salıb

    Technote.az “Engadget” platformasına istinadən bildirir ki, Samsung Porsche avtomobilləri üçün rəqəmsal açar dəstəyini işə saldığını elan edib. Artıq Porsche Macan və tezliklə satışa çıxacaq Porsche Cayenne Electric sahibləri avtomobillərini sadəcə Galaxy smartfonları ilə açıb işə sala biləcəklər. Yeni funksiya Samsung Wallet tətbiqinin “Digital Key” xüsusiyyəti vasitəsilə UWB və ya NFC üzərindən təhlükəsiz şəkildə işləyir.

    Rəqəmsal açar dəstəyi dekabr ayında ilk olaraq Avropada istifadəyə veriləcək və daha sonra Porsche-nin satış qrafikinə uyğun olaraq qlobal olaraq genişləndiriləcək. Samsung Wallet - Galaxy S20, Note 20, Galaxy Z Fold 2 və Galaxy Flip 5G kimi nisbətən köhnə cihazlardan başlayaraq şirkətin əksər yeni telefonlarında mövcuddur.

    Google Pixel və Apple iPhone-lardakı oxşar funksiyalar kimi, Samsung-un rəqəmsal açarı da istifadəçilərə avtomobili telefondan birbaşa açmaq, bağlamaq və işə salmaq imkanı verir. Əgər telefon oğurlanarsa, istifadəçi rəqəmsal açarı uzaqdan bloklaya və ya silə bilər.