Tesla sürücüsüz taksi xidmətini San Antonio şəhərinə genişləndirir

    “Tesla” robotaksi xidmətini Texas ştatının San Antonio şəhərində də açır. Şirkətin avtomobilləri 9 noyabr saat 15:00 etibarilə sərnişin daşımağa başlayacaq. San Antonio “Tesla”nın sürücüsüz sərnişindaşıma xidməti göstərdiyi növbəti ABŞ şəhəri olacaq. Şirkət burada “Waymo” ilə rəqabət aparacaq.

    “Tesla” xidmətin hansı saatlarda işləyəcəyini, neçə avtomobillə başlayacağını və şəhərin hansı hissələrini əhatə edəcəyini açıqlamayıb. Donanmaya qızılı rəngli, 2 yerlik “Cybercab” modellərinin qoşulub-qoşulmayacağı da bilinmir. Xidmətdə yalnız dəyişdirilmiş “Model Y” avtomobilləri də işləyə bilər. Avtomobillərdə təhlükəsizliyə nəzarət edən şəxsin olub-olmayacağı hələ dəqiqləşməyib.

    Şirkət robotaksi xidmətini ilk dəfə 2025-ci ilin iyununda Ostində açıb. Başlanğıcda xidmət kiçik ərazini əhatə edirdi və avtomobillərin sayı az idi. Salonda təhlükəsizliyə nəzarət edən operatorlar olurdu. Sınaq zamanı avtomobillər ətrafı yalnız kameralarla izləyir, idarəetməni isə süni intellekt sistemi yerinə yetirirdi. “Tesla” yanvar ayında Ostindəki avtomobillərdən təhlükəsizlik nəzarətçilərini çıxarıb və tam sürücüsüz xidmətə keçib.

    “Tesla” son 11 ayda Ostində xidmət zonasını genişləndirib. Şirkət Mayami, Orlando, Dallas, Fort-Uert və Hyustonun məhdud ərazilərində də xidmətə başlayıb. Ostində 400-dən çox sürücüsüz avtomobil qeydiyyatdadır. Digər şəhərlərdə bu say bir neçə avtomobildən bir neçə onluğa qədər dəyişir. Fort-Uertdə 24, Mayamidə isə cəmi 5 avtomobil var.

    Rəqib “Waymo” da Ostin, Dallas, Hyuston və San Antonioda robotaksi xidməti göstərir. “Alphabet” şirkətinə məxsus xidmətin donanmasına sürücüsüz “Jaguar I-Pace” və “Zeekr RT” avtomobilləri daxildir. “Waymo” avtomobilləri su basmış yollara girib ilişdikdən sonra şirkət San Antoniodakı xidməti 5 ay dayandırmışdı. Xidmət bu yaxınlarda yenidən açılıb.

    “Tesla” San-Fransisko körfəzi bölgəsində də sərnişin daşıyır, lakin həmin avtomobilləri sükan arxasındakı insan idarə edir. Şirkətin Kaliforniyada sürücüsüz xidmət göstərmək üçün tələb olunan icazələri yoxdur. Xidmət coğrafiyası genişlənsə də, bu yay açıqlanan rəqəmlərə görə, ödənişli sərnişinlərlə qət edilən məsafə 2-ci rübdə 1-ci rüblə müqayisədə azalıb.