Volvo və Nvidia sürücü nəzarətli avtomatik sürüş sistemi hazırlayır

    “Volvo” “Nvidia” ilə əməkdaşlığını genişləndirir. Şirkətlər şəhər küçələrində və magistrallarda işləyəcək yeni qismən avtomatlaşdırılmış sürüş sistemi hazırlayır. “Volvo” onu 2030-cu ilə qədər istifadəyə verməyi planlaşdırır. Level 2++ səviyyəli sistem avtomobili başlanğıc nöqtəsindən təyinat yerinə qədər sürücünün əlləri sükanda olmadan idarə edə biləcək. Ancaq sürücü yenə də yola nəzarət etməli və lazım gəldikdə idarəetməni ələ almalıdır.

    Sistem svetoforların, dayanma nişanlarının və ayrıca işıqla tənzimlənməyən sola dönüşlərin olduğu mürəkkəb şəhər yollarında da işləyəcək. Funksiya “Tesla”nın sürücü nəzarəti tələb edən “Full Self-Driving” sisteminə və “Mercedes-Benz”in yeni “CLA” sedanındakı həllə bənzəyəcək. “Volvo” texnologiyanın ilk olaraq hansı modeldə olacağını açıqlamayıb. Yalnız bunun tamamilə yeni avtomobil olacağı deyilib. Model 2030-cu ilin sonunadək göstəriləcək.

    Layihədə “Nvidia”nın “Hyperion” sensor və hesablama platforması, “Alpamayo” sürüş proqramı və “Halos” təhlükəsizlik qiymətləndirmə sistemi işlədiləcək. “Hyperion” güclü çipləri avtomobilin ətrafındakı kamera və radarlarla birləşdirir. İlkin versiyada məsafəni lazerlə ölçən lidar sensoru olmayacaq, amma “Volvo” onu gələcəkdə əlavə edə bilər. “Alpamayo” yol şəraitini təhlil edərək sükan, əyləc və sürətlənmə ilə bağlı qərarları planlaşdıracaq.

    “Alpamayo” süni intellekt modellərini, məlumat bazalarını, virtual sınaqları və proqram hazırlama alətlərini ənənəvi sürüş proqramı ilə birlikdə işlədir. Kamera və radardan gələn məlumatları emal edən 2 proqram qatı eyni anda çalışır. “Nvidia”ya görə, bu yanaşma sistemin daha ehtiyatlı və təhlükəsiz işləməsinə kömək edir. Açıq mənbəli proqram artıq 650 000-dən çox proqramçı tərəfindən yüklənib.

    “Volvo” layihəyə öz təhlükəsizlik sistemlərini və sürücünün davranışını ətraflı izləyən texnologiyasını da əlavə edəcək. Avtomobillər bir-biri ilə əlaqəli təhlükəsizlik sistemi üzərindən yol işləri, təhlükələr və qarşıdakı şərait barədə məlumat paylaşacaq. Beləliklə, sistem yalnız hər avtomobilin öz sensorlarından gələn məlumatla kifayətlənməyəcək. Funksiyanın başlanğıc səviyyəli modellərdən bahalı versiyalaradək bütün model sırasına əlavə olunması planlaşdırılır.

    Əməkdaşlıq təkcə elektrikli modellərlə məhdudlaşmayacaq. Texnologiyanın plagin hibrid və benzinlə işləyən avtomobillərə də əlavə edilməsi planlaşdırılır. Hazırda “Volvo”nun bütün elektrikli avtomobillərində “Nvidia”nın “Orin” çipi işləyir. Şirkət daha əvvəl ABŞ-də icazə ala bilmədiyi “Ride Pilot” layihəsini dayandırmışdı. Lidar planından da təchizatçı “Luminar” iflas etdikdən sonra imtina olunmuşdu. “Nvidia” davamlı proqram xidmətlərini “Volvo” üçün gəlir mənbəyinə çevirməyi də planlaşdırır.