Google Maps Apple CarPlay-də ilk dəfə səsli köməkçi əldə edir: Gemini

    “Google”, “Apple CarPlay”də “Google Maps” ilə yol tapan sürücülər üçün “Gemini” dəstəyini yaymağa başlayıb. Sürücülər xəritədən çıxmadan süni intellekt köməkçisi ilə səsli danışa bilirlər. Funksiya hazırda ABŞ-də açıqdır və digər ölkələrdə də yayılmağa başlayıb. Dərhal görünməsə, yeniləmə bir neçə günə çata bilər.

    “Google Maps” açıldıqda ekranın sağ kənarında, aşağı hissəyə yaxın yeni “Gemini” işarəsi görünür. Səsli söhbətə başlamaq üçün həmin düyməyə toxunmaq kifayətdir. Beləliklə, “Google Maps” “CarPlay” daxilində ilk dəfə səsli köməkçi funksiyası əldə edib. Əvvəllər “Google Assistant” yalnız naviqasiya birbaşa “iPhone”da işlədiləndə açılırdı.

    “Gemini” bir neçə addımdan ibarət sual və əmrləri başa düşür. Məsələn, sürücü şəhər mənzərəli park tapa, ora getmək üçün uyğun vaxtı öyrənə və ödənişli yollardan keçməyən marşrut qura bilər. Yoldakı maneələri də səsli şəkildə köməkçiyə demək olur. Sürücü bütün bunları sükanı buraxmadan edə, yolüstü dayanacaqlar və məkanlar haqqında məlumat ala bilər.

    Yenilik ötən il “Android Auto”ya əlavə olunan “Gemini” naviqasiya funksiyalarını “CarPlay”ə gətirir. “Google” daha əvvəl “Android Auto”da “Personal Intelligence” funksiyasını da yaymağa başlayıb. Bu funksiya cavabları istifadəçiyə uyğunlaşdırmaq üçün “Gmail”, “Calendar”, “Maps”, “Photos”, “YouTube” və “Search”dəki məlumatlardan yararlana bilir. Ancaq fərdiləşdirmə funksiyası barədə “CarPlay” üçün məlumat yoxdur.