Google Gmail, Docs və Keep üçün səsli AI funksiyalarını təqdim etdi

    “Google” sınaqdan keçirdiyi “Gmail Live” süni intellekt funksiyasını ödənişli AI planlarının abunəçiləri üçün açıb. Keçən ay “Google I/O” tədbirində elan olunan funksiya “Gmail”də danışaraq axtarış aparmaq üçündür. İş prinsipi “Gemini” ilə səsli söhbətə bənzəyir, amma elektron poçta uyğunlaşdırılıb.

    “Gmail Live” uzun yazışmaları əl ilə yoxlamadan məktublardakı məlumatları tapır. Məsələn, istifadəçi uçuş qapısının nömrəsini və ya övladının məktəbində həftə ərzində hansı hadisələrin olacağını səslə soruşa bilər. Süni intellekt gələn məktubları yoxlayaraq qısa cavab hazırlayır.

    “Docs Live” eyni üsulu sənədlərdə tətbiq edir. İstifadəçi “Gemini”yə hansı sənədi hazırlamaq istədiyini deyir. Sistem “Gmail”, “Drive”, “Chat” və internetdəki uyğun məlumatları toplayaraq ilkin mətn yazır. Daha sonra mətnin üslubunu istifadəçinin istəyinə uyğun dəyişmək olur.

    “Keep Live” səslə deyilən qarışıq fikirləri nizamlı qeydlərə çevirir. Funksiya səsli tapşırıqları arxa planda işləyərək istifadəçi yazmadan siyahı və qeydlər hazırlayır. Göstərilən nümunədə otağı rəngləmək istəyən şəxs üçün alış siyahısı və işi necə görmək barədə təlimat yaradılır.

    “Gmail Live” və “Keep Live” bu həftə istifadəyə verilir. Hər 2 funksiya yalnız “Google AI Plus”, “Google AI Pro” və “Google AI Ultra” abunəçiləri üçün açıqdır. “Docs Live” yalnız “Pro” və “Ultra” planlarında işləyəcək. Yeniliklərin yaxın vaxtlarda “Google Workspace” biznes müştəriləri üçün də açılacağı açıqlanıb.