Google Pixel smartfonları Android 16-nın stabil versiyasını əldə etməyə başlayıblar

     Google Pixel smartfonları stabil Android 16 versiyasını əldə etməyə başlayıblar. Lakin bu ilin əvvəlində elan edilmiş Material 3 Expressive dizayn konsepsiyası çərçivəsində nəzərdə tutulan genişmiqyaslı yeni istifadəçi interfeysi dizaynı, görünür ki, daha sonraya təxirə salınıb. Mənbənin məlumatına görə, interfeysin görünüşü sentyabrın 3-dən yayımına başlanacaq yeniləmə ilə dəyişəcək. Android 16-nın əsas yeniliklərindən biri Live Updates funksiyasıdır.

     Bu, real vaxt rejimində yenilənən bildirişlərdir və məsələn, istifadəçiyə səfərin və ya çatdırılmanın statusunu izləməyə imkan verir. Eyni zamanda, istifadəçi belə bildirişlərlə tətbiqə daxil olmadan birbaşa qarşılıqlı əlaqə qura bilir. Daha bir faydalı yenilik eşitmə problemi olan istifadəçilərə yönəlib. İndi eşitmə cihazlarından istifadə edənlər zəng zamanı səsin hansı mikrofondan ötürüləcəyini seçə biləcəklər. Məxfilik səviyyəsini artırmaq üçün gücləndirilmiş qoruma rejimi təqdim olunub.

     Bu rejim cihazın sındırılmasına cəhd aşkarlandıqda məlumatlara və funksiyalara çıxışı məhdudlaşdırır. Bundan əlavə, yeni Bluetooth rejimi istifadəyə verilib. Bu rejim səsi eyni anda bir neçə qurğuya ötürməyə imkan yaradır. Material 3 Expressive dizayn konsepsiyası isə ikon formalarının, şrift üslublarının və rəng palitrasının yenilənməsini, həmçinin Android interfeysində daha təbii animasiyaların əlavə edilməsini nəzərdə tutur. Hazırda bu yeniliklərin bəzilərini Android 16 QPR1-in beta versiyasında görmək mümkündür. Gözlənilir ki, növbəti beta versiyada daha çox dizayn dəyişiklikləri reallaşdırılacaq.