Google tətbiqləri silinmədikləri üçün şirkətə qarşı şikayət qaldırılıb

     6 rəqəmsal sahədə ixtisaslaşmış insan hüquqları təşkilatı Avropa hakimiyyət orqanlarına Alphabet holdinqinin antiinhisar qanunvericiliyini pozması ilə bağlı şikayət göndərib. Onlar Avropa Birliyinin tənzimləyici qurumlarını texnologiya nəhənginin istifadəçilərə tətbiqləri asanlıqla silmək imkanı verən qanunlara əməl edib-etmədiyini yoxlamağa çağırıblar. Reuters-in məlumatına görə, 2 il əvvəl qüvvəyə minmiş Avropa "Rəqəmsal bazarlar haqqında qanunu" (DMA) Google da daxil olmaqla 7 böyük texnologiya şirkətinin hansı addımları ata biləcəyini və hansıları ata bilməyəcəyini müəyyən edir. Bu tədbir onların təsirini məhdudlaşdırmaq, rəqiblər üçün daha geniş fəaliyyət azadlığı yaratmaq və istehlakçılar üçün seçim imkanlarını artırmaq məqsədi daşıyır.

     Böyük Britaniya və materik Avropasından olan bir sıra hüquq müdafiə təşkilatlarının fikrincə, Alphabet DMA tələblərinə əməl etmir. Şikayətçilər hesab edirlər ki, Google DMA-nın tələbini pozub. Bu tələbə əsasən, “qapıçı” adlandırılan, böyük platformalar üzərindən biznes-müştərilərə xidmət göstərən şirkətlər istifadəçilərə həmin “qapıçı”nın əməliyyat sistemindən tətbiqləri asanlıqla silmək üçün texniki imkan təqdim etməlidir. Hüquq müdafiəçilərinin şikayətində qeyd olunur: “Alphabet öz əsas Android platformasını elə şəkildə hazırlayıb ki, son istifadəçilər onun öz ‘qapıçı’ tətbiqlərini söndürmək imkanını görə bilməsinlər.

     Hətta bütün çətinliklərə baxmayaraq bu imkanı aşkar edən istifadəçiləri Alphabet qorxutmağa çalışır - yəni Google-un əvvəlcədən yüklənmiş tətbiqlərini deaktiv etdiklərinə görə”. Hüquq müdafiəçiləri Avropa Komissiyasını bu məsələ ilə bağlı araşdırma aparmağa çağırıblar. Alphabet isə bütün bu ittihamları rədd edib. Şirkət bildirib: “Android-də tətbiqləri silmək asandır, bu şikayət istifadəçilər arasında narahatlıqları əks etdirmir. Digər tənzimləyici orqanlar, o cümlədən Böyük Britaniyanın Rəqabət və Bazarlar İdarəsi (CMA), bu şikayəti daha əvvəl rədd edib”. Avropa Komissiyası sənədin onlara daxil olduğunu təsdiqləyib.