Meta Horizon Studio adlı virtual dünyaların redaktorunu təqdim edib

     Meta özünün Roblox-a bənzəyən sosial platforması Horizon Worlds-u təkmilləşdirməyə qərar verib. Ən vacib yeniliklərdən biri yeni oyun mühərriki və tərtibatçılara oyun ssenariləri yaratmağa kömək edəcək təkmilləşdirilmiş qrafikaya malik Meta Horizon Studio redaktoru olacaq. Meta Horizon Studio - virtual dünyalar yaratmağa imkan verən bir redaktordur. Tekstura və səsi daxili süni intellekt alətləri vasitəsilə generasiya etmək mümkündür. İlin sonuna qədər Meta redaktora süni intellekt köməkçisini də inteqrasiya edəcək ki, bu da inkişaf prosesini daha da asanlaşdıracaq.

     Meta Connect 2025 tədbirində isə tərtibatçı çat-botla ünsiyyət quraraq yeni virtual mühitin generasiyasında kömək alıb və oyundakı personajlardan birinin xarakterini dəyişdirib. İndi şirkətin metakainatlarının əsasını Horizon Engine təşkil edir. Meta-nın bildirdiyinə görə, bu mühərrik təkmilləşdirilmiş qrafika, daha yüksək məhsuldarlıq və daha inkişaf etmiş virtual dünyalar təmin edir, o cümlədən eyni vaxtda giriş imkanının əhəmiyyətli dərəcədə artırılması ilə çoxlu sayda istifadəçi üçün imkan yaradır. Horizon Worlds platforması hələ də kifayət qədər məşhur ola bilməyib, baxmayaraq ki, artıq virtual reallıq çərçivəsindən çıxaraq mobil cihazlarda da mövcuddur. Lakin Meta bu metakainatda yeni oyun yaradıcılarını cəlb etməyə çalışır - bu il onlar üçün 50 milyon dollarlıq dəstək fondu yaradılıb.