Meta öz tətbiqlərini Google-un süni intellekt həlləri ilə yaxşılaşdırmaq istəyir

     Meta Google Cloud ilə Gemini süni intellekt modellərindən Facebook sosial şəbəkəsinin reklam biznesini yaxşılaşdırmaq üçün istifadə imkanlarını müzakirə edir. Məlumata görə, danışıqlar erkən mərhələdədir, buna görə də mümkün razılaşmanın imzalanmasından danışmaq hələ tezdir. Danışıqlar zamanı Meta əməkdaşları Google Cloud-a Gemini və açıq mənbə kodlu Gemma modellərini Meta-nın reklam məlumatları əsasında əlavə təlimdən keçirməyi təklif ediblər ki, bu da reklam hədəflənməsi imkanlarını yaxşılaşdırsın. Meta-nın öz daxili modelləri əvəzinə Google-un süni intellekt həllərinə müraciət etməsi şirkətin süni intellekt texnologiyalarını miqyaslandırmaqda qarşılaşdığı problemləri vurğulayır.

     Halbuki şirkət tədqiqatlara, infrastruktur və kadrlara milyardlarla investisiya yatırıb. Meta və Google onlayn reklam bazarında birbaşa rəqibdirlər. Hər iki şirkət son rüblük hesabatlarında qeyd ediblər ki, süni intellektə qoyulan sərmayələr onların əsas reklam biznesinin artımına töhfə verir. Ötən ay xəbər verilmişdi ki, Meta bundan əvvəl də Google və ya OpenAI ilə əməkdaşlıq imkanını nəzərdən keçirib. Məqsəd isə öz həllərində süni intellekt texnologiyalarının səmərəliliyini artırmaq idi. Buraya Meta AI çat-botunda sorğulara verilən cavabların keyfiyyətini yüksəltmək və eləcə də Meta-nın sosial şəbəkə tətbiqlərində süni intellekt funksiyalarını həyata keçirmək daxildir.