Discord Clyde adlı çat-botuna ChatGPT-nin imkanlarını inteqrasiya edib

    Məşhur Discord messencerinin daxilində mövcud olan Clyde adı çat-bot uzun müddətdir ki, istifadə edilir. Lakin sözügedən çat-bot məhdud sayda funksiyaya sahibdir. Bu vəziyyət yaxın zamanda dəyişəcək. Belə ki, Discord öz çat-botuna süni zəka əsaslı ChatGPT-nin inteqrasiyasını elan edib. Bu inteqrasiya qapalı beta test çərçivəsində reallaşdırılıb. Bununla yanaşı Discord yenilənmiş Clyde çat-botunun nələrə qadir olduğu barəsində məlumatları da təqdim edib. Beləliklə yenilənmiş Clyde məhdud sayda istifadəçi arasında test rejimində çalışır.

    Məlumdur ki, o, ChatGPT-nin bütün imkanlarını əldə edib. Belə ki, o, ChatGPT kimi cavabları tərtib edə və müxtəlif əməliyyatları yerinə yetirə bilir. Çat-botun unikal funksiyaları arasında isə onun Discord serverinə sıx inteqrasiyası var. Məsələn Clyde bu və ya digər istifadəçinin yaşadığı regionda gecə və ya gündüz olduğunu təyin edərək ona mesaj yazmağın düzgün olub-olmadığını məsləhət görəcək. Çat-botun sahib olduğu digər bir maraqlı funksiya isə çat daxilində ötürülmüş mesajların ümumiləşdirilməsidir.

    Məsələn istifadəçi iki gün ərzində Discord-a daxil olmayıb. İki gündən sonra o, çat-botdan iki gün ərzində baş vermişlərin qısa xülasəsini istəyə bilər. Çat-bot isə öz növbəsində iki gün ərzində istifadəçi tərəfindən Discord daxilində buraxılmış hadisələrin qısa təsvirini təqdim edəcək. Discord yenilənmiş Clyde çat-botunun açıq beta testinin nə zaman keçiriləcəyi barəsində məlumat verməyib. Discord həmçinin ChatGPT-ni özünü  AutoMod adlı moderasiya sisteminə də inteqrasiya edib. Nəticədə ChatGPT vasitəsilə AutoMod Discord qaydalarına zidd olan halları təyin edə biləcək.