İstifadəçilər ChatGPT-dən şikayətlənməyə başlayıblar

    Xarici kütləvi informasiya vasitələrinin verdikəri məlumata əsasən ChatGPT istifadəçilərinin sözügedən çat-bot barəsində müsbət fikirləri artıq skeptik fikirlərlə əvəzlənməyə başlayıb. Onlar süni zəka əsaslı çat-botun çalışma keyfiyyətindən daha çox şikayətlənməyə başlayıblar. OpenAI şirkətinin serverlərinə müraciət edən istifadəçilərin sayı isə azalıb. Insider saytının verdiyi məlumata əsasən ChatGPT-nin aylıq ödənişli ChatGPT Plus versiyasından istifadə edənlər bildiriblər ki, çat-botla çalışma zamanı onun təqdim etdiyi nəticələrin keyfiyyətləri aşağı düşüb. ChatGPT Plus-ın əsasında dayanan GPT-4 dil modeli daha əvvəlki GPT-3.5 dil modelindən sürətli çalışsa da, tərtib edilən cavabların doğruluqlarında problemlər yaşanır.

    GPT-4-ün çalışma prosesində yaranan problemlər barəsində ilk məlumatlar hələ may ayında ortaya çıxmışdı. Son həftələrdə isə problemlərin sayı daha da artıb. Məsələn ChatGPT Plus istifadəçilərindən biri qeyd edib ki, çat-botdan istifadə təcrübəsi ani olaraq köhnə pikapa çevrilmiş Ferrari-nin idarə edilməsinə bənzəyib. Süni zəka sahəsi ilə bağlı olan cəmiyyətin bəzi üzvlərinin fikirlərinə əsasən çat-botun əsasında dayanan alqoritmin işindəki dəyişikliklər neyron şəbəkəsinin çalışma konseptinin dəyişməsi ilə əlaqəlidir. Bəzi məlumatlara əsasən GPT-4 dil modeli çoxlu sayda daha kiçik dil modelinə bölünmüş ola bilər. Bu isə resurslara qənaətin edilməsi istiqamətində edilmiş ola bilər.