Microsoft şirkətlərə müştərilərin məktublarına avtomatik cavab verəcək süni zəka əsaslı funksiyanı təklif edib

    Microsoft öz məhsullarından birinə OpenAI şirkətinin süni zəka sistemi əsasında hazırlanmış maraqlı bir funksiyanı inteqrasiya etdiyini elan edib. Söhbət, şirkətlərdə olan satış şöbəsindəki əməkdaşlar üçün nəzərdə tutulmuş Viva Sales tətbiqindən gedir. Sözügedən tətbiq müştərilər ilə qarşılıqlı əlaqə üçün nəzərdə tutulmuş istənilən sistemin imkanlarını genişləndirmək üçündür. Microsoft öz növbəsində bu tətbiqə GPT 3.5 dil modeli əsasında çalışan yeni funksiyanı əlavə edib. Qeyd etmək lazımdır ki, son zamanlarda çox məşhurlaşmış süni zəka əsaslı ChatGPT çat-botu məhz GPT 3.5 dil modeli əsasında çalışır.

    Office 365 ilə Microsoft Dynamics-ə sıx inteqrasiya edilmiş Viva Sales tətbiqi OpenAI şirkətinin süni zəka əsaslı alqoritmindən istifadə edərək elektron məktublar üçün cavablar tərtib edə bilir. Süni zəka əsaslı alqoritm öz növbəsində müştərilən məktublarında olan məlumatları yığaraq və əldə edilmiş məlumatları emal edərək elektron məktubu göndərmiş şəxsi maraqlandıran məlumatları, qiymətləri və reklam aksiyalarını özlərində birləşdirən personallaşdırılmış cavabları tərtib edəcək. Viva Sales tətbiqi keçən ilin oktyabr ayında istifadəyə verlib. O, müştərilərlə qarşılıqlı münasibətlərin idarəsi servisi olan Microsoft Dynamics ilə yanaşı həmçinin Salesforce adlı CRM sistem ilə də çalışır.

    Microsoft Dynamics-in Premium istifadəçiləri üçün Viva Sales tətbiqi pulsuz şəkildə təqdim edilir. Salesforce sisteminin istifadəçiləri isə sözügedən tətbiqdən faydalanmaq üçün ayda 40$ ödəməli olacaqlar. Süni zəka əsaslı alqoritmlərin Microsoft məhsullarına inteqrasiya edilməsi öz növbəsində Microsoft-un OpenAI şirkəti ilə əməkdaşlığının nəticəsidir. Qeyd etmək lazımdır ki, yaxın zamanda Microsoft-un Bing axtarış sistemində ChatGPT əsasında axtarış imkanı da istifadəyə verilməlidir.