Avstraliyanın sərt sosial media qanununda ciddi boşluq aşkarlandı

    Avstraliyada 16 yaşdan kiçik şəxslərin sosial media platformalarından istifadəsini məhdudlaşdıran yeni qanun gözlənilən effekti vermir. Ölkənin yaş yoxlama sistemini sınaqdan keçirən mütəxəssislər müəyyən ediblər ki, qanunun qüvvəyə minməsindən sonra açılan 50 test hesabının heç birində istifadəçilərdən yaşlarını təsdiqləyən sənəd tələb olunmayıb. Araşdırma çərçivəsində tədqiqatçılar qanunla əhatə olunan 10 platformadan doqquzunda hesab yaradaraq istifadəçinin yaşını 16 olaraq göstəriblər. Testlər zamanı nə bir şəxsiyyət vəsiqəsi, nə də hər hansı əlavə yaş təsdiqləmə mexanizmi tələb edilib.

    Sınaqları həyata keçirən Melburnda yerləşən KJR şirkətinin direktoru Endryu Hammond bildirib ki, sistemin əsas problemi istifadəçilərin ilkin qeydiyyat mərhələsində düzgün yoxlanılmamasıdır. Onun sözlərinə görə, istifadəçilər yaşlarını sübut etməli olsalar da, testlər zamanı heç bir platforma belə bir tələb irəli sürməyib. Araşdırmada aktiv qalan hesablar arasında Meta şirkətinin sahibi olduğu Facebook və Instagram, həmçinin Snapchat, TikTok və YouTube da yer alıb. Yeganə istisna isə Avstraliyanın canlı yayım platforması olan Kick olub. Platforma hesab yaratmaq üçün yaş təsdiqi tələb edib.

    Avstraliyanın qanununa əsasən, 16 yaşdan kiçik şəxslərin Facebook, Instagram, Snapchat, Threads, TikTok, Twitch, X, YouTube, Kick və Reddit platformalarında hesab açması qadağandır. Qanunu sistemli şəkildə pozan şirkətləri 54,6 milyon Avstraliya dollarına (təxminən 36 milyon ABŞ dolları) qədər cərimə gözləyir.