Google valideyn nəzarəti ilə bağlı əsas qaydanı dəyişdi

    Technote.az “Mashable” platformasına istinadən bildirir ki, Google valideyn nəzarəti sistemində mühüm dəyişiklik etdiyini açıqlayıb. Şirkət bildirib ki, bundan sonra valideyn nəzarəti altında olan yeniyetmələr (Family Link vasitəsilə) 13 yaşına çatdıqda bu nəzarəti təkbaşına söndürə bilməyəcəklər.

     Əvvəllər Google-un qaydalarına əsasən, 13 yaşına çatan azyaşlılar valideyn nəzarətini öz istəkləri ilə deaktiv edə bilirdi. Yeni qərara görə isə yeniyetmənin hesabını müstəqil idarə etməsi üçün valideynin açıq razılığı tələb olunacaq. Google sözçüsü Mashable-a bildirib ki, bu dəyişiklik bu həftə etibarilə qlobal miqyasda qüvvəyə minir.

     Google-un qlobal məxfilik və təhlükəsizlik üzrə rəhbəri Kate Charlet LinkedIn paylaşımında qeyd edib ki, bu addım valideyn və yeniyetmənin hər ikisi özlərini hazır hiss edənə qədər qoruyucu tədbirlərin qüvvədə qalmasını təmin edəcək. Onun sözlərinə görə, məqsəd uşaqların onlayn təhlükəsizliyini daha balanslı və məsuliyyətli şəkildə qorumaqdır.