Meta yazdığınız təsvirlə Instagram effekti yaradan AI aləti təqdim etdi

    “Meta” mətnlə verilən sorğu əsasında “Instagram Stories” üçün fərdi effektlər hazırlayan “Instagram Effect Builder” alətini çıxarıb. Süni intellektlə işləyən bu veb alətdə istifadəçi istədiyi üslubu sadə sözlərlə təsvir edir. Sonra effekti öz fotolarında əvvəlcədən yoxlaya bilir. Xidmət hələlik yalnız ABŞ-də yaşayan və yaşı 18-dən yuxarı olan “Instagram” istifadəçilərinə açıqdır.

    “Effect Builder”dəki sorğu xanasına effekt ideyasını yazmaq, həmçinin üslub nümunəsi kimi şəkillər əlavə etmək olur. İstifadəçi öz fotolarını yükləyərək hazırlanan görünüşü sınaqdan keçirə bilər. Nəticə istədiyi kimi alınmasa, əlavə sorğularla rəng, işıq və başqa detalları dəyişə bilir. Alətdən yararlanmaq üçün dizayn və ya proqramlaşdırma biliyi tələb edilmir.

    Alətdə qısa sorğunu süni intellektlə daha ətraflı yazmaq seçimi də var. Sınaq zamanı fotoları komiks səhifələrinə çevirən filtr üçün yazılmış 1 cümləlik istək bir neçə abzaslıq təsvirə çevrilib. Genişləndirilmiş mətndə rəng çalarları və işıqlandırma kimi detallar da göstərilib. Ancaq bu sorğunun yaratdığı nəticə ilkin qısa sorğu ilə alınan görüntüdən demək olar ki, fərqlənməyib.

    Hazırlanan effekti birbaşa “Instagram”a göndərmək olur. Ancaq effekt başqa insanlara açılmazdan əvvəl təhlükəsizlik yoxlamasından keçməlidir. Təsdiqdən sonra o, “Instagram Stories” bölməsində bütün istifadəçilərə açılır və hər kəs effektdən yararlana bilir. Başqa biri effekti işlədəndə yaradıcının profili də göstərilir. Beləliklə, müəllifin digər işlərini tapmaq asanlaşır.

    “Instagram Effect Builder” ayrıca veb alətdir, amma “Meta” onu pulsuz video redaktoru olan “Instagram Edits” tətbiqinin davamı kimi təqdim edir. “Instagram Edits” 2025-ci ildə “iPhone” üçün çıxıb, “Mac” versiyası isə bir neçə gün əvvəl təqdim olunub. Kompüter versiyasında daha geniş iş sahəsi, dəqiq redaktə alətləri və istifadəçiyə uyğun dəyişdirilən klaviatura qısayolları var. Tətbiq müxtəlif ekran ölçülərinə uyğun videoları dəstəkləyir. Hazırlanan videonu yaddaşa köçürmək və ya istənilən platformaya yükləmək olur.