Pentaqon rəsmisi edamın canlı yayımlanacağını deyib, platforma bilinmir

    “YouTube”, “Meta”, “Twitch” və “X” ABŞ hökumətinin edamı canlı yayımlamasına icazə verib-verməyəcəklərini açıqlamayıblar. Pentaqonun adı açıqlanmayan rəsmisi deyib ki, 2009-cu ildə Texasdakı hərbi bazada kütləvi atışmaya görə məhkum olunan Nidal Hasanın edamı canlı göstəriləcək. Lakin bu açıqlamadan sonra 4 platforma mövqeyini bölüşməyib.

    “TikTok” və “Kick” belə yayımın qaydalara zidd olacağını təsdiqləyib. “TikTok” təmsilçisinin sözlərinə görə, platformada insanın ölüm anı da daxil olmaqla, sarsıdıcı və açıq zorakılıq görüntüləri qadağandır. Məzmuna nəzarətdə daha yumşaq yanaşması ilə tanınan “Kick” də edam yayımının icma qaydalarını pozacağını deyib.

    Nidal Hasan 2009-cu ildə Texas ştatındakı hərbi bazada baş verən kütləvi atışmaya görə məhkum edilib. Onun dekabrın 4-də saat 03:00-da güllələnərək edam olunması planlaşdırılır. Pentaqon rəsmisinin açıqlamasına baxmayaraq, yayımın hansı platformada və hansı hesabdan aparılacağı bilinmir.

    “Meta”, “Twitch” və “X” qaydalarına görə, insan ölümünün göstərildiyi zorakı məzmun qadağandır. “YouTube” da ciddi xəsarət və ya ölüm riski yaradan təhlükəli, yaxud qanunsuz hərəkətləri təşviq edən videolara icazə vermir. Odlu silah tutan və ya ondan istifadə edən şəxsin göründüyü canlı yayımlar da platformada qadağandır. Ancaq bu şirkətlərin ABŞ hökuməti üçün istisna edib-etməyəcəyi aydın deyil. “Rumble” da məsələ ilə bağlı mövqeyini açıqlamayıb.