Reddit RSS-i 13 noyabrda, açıq API-ni 2027-ci ilin martında bağlayacaq

    “Reddit” RSS lentlərini və açıq API girişini bağlayacağını açıqlayıb. Şirkət bu qərarı geniş miqyasda məlumat toplanması, süni intellekt botları və avtomatlaşdırılmış sui-istifadə halları ilə izah edir. “Reddit” 13 noyabrda RSS dəstəyini dayandıracaq. Açıq API girişi də mərhələli şəkildə məhdudlaşdırılaraq 2027-ci ilin martında tam bağlanacaq.

    RSS saytlardakı yeni paylaşımları standart formada xəbər oxuma tətbiqlərinə çatdıran veb lentidir. Moderatorlara bildiriş almaq üçün “Discord Relay Devvit” tətbiqinə keçmək və iş qaydalarını 13 noyabrdan əvvəl yeniləmək məsləhət görülür. İdarə etdikləri icmalardan kənarda RSS-dən yararlananlara başqa seçim verilməyəcək. İstifadəçilər qərarın “Reddit”dəki məzmuna çıxışı çətinləşdirəcəyini deyirlər.

    Açıq API bağlandıqdan sonra tədqiqat alətləri, sosial şəbəkələri izləyən xidmətlər və süni intellekt köməkçiləri “Reddit” müzakirələrinə proqramlarla pulsuz qoşula bilməyəcək. Təsdiqlənmiş tətbiq və bot hazırlayanlar onları 12 yanvar 2027-ci ilədək qeydiyyatdan keçirməlidir. Qeydiyyatdan keçməyənlərin API çıxışı həmin gün silinəcək. Qalan bütün açıq girişlər 2027-ci ilin martında dayandırılacaq. “Reddit” məlumatlarından yararlanmaq istəyən süni intellekt şirkətləri kommersiya müqaviləsi bağlamalı olacaq.

    “Old Reddit” versiyasına giriş qaydaları da sərtləşdirilir. Dəyişiklikdən sonra hesaba daxil olmaq və son 6 ayda “Old Reddit”dən istifadə etmiş olmaq tələb ediləcək. Ancaq şirkətin açıqlamalarında müddətlə bağlı ziddiyyət var: başqa bir məlumatda son 90 gün ərzində istifadə şərti göstərilir. “Reddit”ə görə, hesaba giriş tələbi məlumatların avtomatik toplanmasını artıq azaldıb. Hesabına daxil olmuş moderatorlar üçün bu məhdudiyyət olmayacaq.

    “Reddit” topladığı məlumatlardan kommersiya məqsədilə gəlir götürməyə çalışır. Şirkətin reklamdan kənar gəliri 2-ci rübdə ötən ilin eyni dövrü ilə müqayisədə 24 faiz artıb. Gəlir 43 milyon dollara (təxminən 73,1 milyon manat) çatıb. “Google” və “OpenAI” ilə süni intellektin öyrədilməsi üçün məlumat müqavilələri bağlanıb. “Anthropic” isə botlarla icazəsiz giriş iddiasına görə məhkəməyə verilib. Şirkət “Internet Archive” xidmətinin “Wayback Machine” alətini də bloklayıb. Bununla yanaşı, moderasiya sistemləri və klassik interfeys üçün əlavə qoruma tədbirləri hazırlayır.