Telegram-da ödənişli mesajlar istifadəyə veriləcək

     İnsayderlər Telegram-ın gələcək funksiyalarından birini - ödənişli mesajları açıqlayıblar. Artıq bu funksiyanın harada və necə çalışacağı, habelə kimə gəlir gətirəcəyi barədə bəzi detallar məlum olub. İnternetdə yayılan iPhone üçün Telegram müştərisinin ekran görüntüsünə əsasən, tətbiq istifadəçini çat daxilində ödənişli mesajların aktiv edildiyi, lakin müştəridə bu funksiyanın dəstəklənmədiyi barədə xəbərdar edir. Bu bildiriş Telegram-ın test server çatı üzərindən mesaj göndərməyə cəhd edildikdə görünür.

     Böyük ehtimalla, tərtibatçılar ödənişli mesajları sınaqdan keçirir və hazırda bu funksiyanı ictimaiyyət üçün əlçatan etməyiblər. Telegram Info portalının məlumatına görə, gələcəkdə ödənişli mesajlar həm qruplarda, həm də fərdi çatlarda göndərilə biləcək. Bunun üçün ödəniş vasitəsi kimi Ulduzlar (Stars) adlı daxili valyuta istifadə ediləcək. Qazanılan gəlir çat sahibinə yönəldiləcək, yəni Telegram özü bu funksiyadan birbaşa qazanc əldə etməyəcək. Hələlik ödənişli mesajların Telegram-ın stabil versiyasına nə vaxt əlavə ediləcəyi barədə dəqiq məlumat yoxdur.